ՀՀ տրանսպորտի, կապի և տեղեկատվական տեխնոլոգիաների նախարարությունն ահագին գործեր է արել. կառավարության նիստից հետո լրագրողների հետ զրույցում այս մասին ասաց նախարար Վահան Մարտիրոսյանը։ «Նոր նախաձեռնություններ ունենք և՛ ճանապարհաշինության, և՛ տրանսպորտային ոլորտում, ռեալ արդյունքները դուք գնահատեք, խնդրում եմ»,- դիմելով լրագրողներին՝ ասաց Վ. Մարրտիրոսյանը։
Տրանսպորտի, կապի և տեղեկատվական տեխնոլոգիաների նախարարին այսօր վարչապետի կողմից հանձնարարական տրվեց մինչև 2017-ի հունիսի 1-ը մշակել և ներկայացնել միասնական երթուղային ցանցի ստեղծման տեխնիկական առաջադրանքը: Վահան Մարտիրոսյանը լրագրողների հետ զրույցում վարչապետի հանձնարարականի մասին նշեց. «Անցյալ շաբաթ վարչապետը այց կատարեց մեր նախարարություն, քննարկվեց նաև տրանսպորտի ոլորտի խնդիրներին «հեղափոխական» լուծում տալու հարցը: Քանի որ տրանսպորտային ոլորտը չի բավարարում բնակիչների պահանջները, բնական է, որ առաջարկություններ պետք է ներկայացնենք նոր տրանսպորտային համակարգ ներդնելու վերաբերյալ»:
Անդրադառնալով «Յանդեքս» տաքսի ծառայության հարկերը չմուծելու վերաբերյալ խոսակցություններին՝ նախարարը նշեց. «Այդքան էլ այդպես չէ, հարկերը, բնական է, մուծում են այն վարորդները, ովքեր ուղևորափոխադրում են կատարում, այնտեղ մենք բաժանում ենք այն ծառայությունը, որը որ էլեկտրոնային մատուցվում է, բայց այն մեքենաները, որոնք որ ուղևորափոխադրում կատարում են, նրանք պարտավոր են վճարել»։ Նախարարը ընդգծեց, որ ըստ ներկայացրած բազաների՝ բոլոր մեքենաները չէ, որ վճարում են հարկերը. «Դրա համար մենք ժամանակ առ ժամանակ ստուգումներ ենք կազմակերպում և հայտնաբերում»:
Մանրամասները՝ տեսանյութում: