Կառավարության շենքի մոտ այսօր կրկին հավաքվել էին մի քանի տասնյակ քաղցրաշենցիներ, ովքեր պահանջում էին նախորդ տարի մթերած խաղողի դիմաց իրենց գումարները։ «Վինարի» կողմից շահագործվող գինու գործարանը խաղողագործների պարտքը դեռևս չի մարել:
«Ավոյին հո հերս չի բերել, կառավարությունն ա բերել. իրան բերեցին, որ մեց «քցեն»,- գյուղատնտեսության նախարարին բողոքեց քաղցրաշենցիներից մեկը: Խաղողագործները գյուղնախարարին բողոքեցին նաև վարչապետից. «Վարչապետը խոստանում էր գյուղատնտեսության ոլորտում «բում» անել, հո ասելով չի՞, դե աշխատեք, տենանք»: Գյուղնախարար Իգնատի Առաքելյանը հեռացավ՝ չպատասխանելով խաբված խաղողագործներին:
Գյուղատնտեսության փոխնախարար Ռոբերտ Մակարյանի այն պնդումներին, թե «Վինարի» սեփականատերը որոշ գումար բաժանել է, քաղցրաշենցիները վստահեցրին, որ պարտք ունեցող գյուղացիներից մեկ տոկոսին է այն հասել, մնացածը մարզպետի, միլպետի, բարեկամների հարցերն են լուծել:
Ռոբերտ Մակարյանը լրագրողներին տեղեկացրեց, որ այսօր «Վինարի» սեփականատերը խոստացել է 10 մլն դրամ գումար տրամադրել և գյուղացիների մի մասի պարտքերը մարել, նա այսօր հրավիրվել է նախարարություն:
Հարցին՝ վարչապետը տեղյա՞կ է, որ «Վինարի» սեփականատերը չի կատարել խոստումը, Ռոբերտ Մակարյանը պատասխանեց, որ նախարարն այսօր վարչապետին կզեկուցի այդ մասին:
Մանրամասները՝ տեսանյութում: