ԱՄՆ նախագահի ընտրություններին միջամտելու ծրագիրը մշակել է Վլադիմիր Պուտինի վարչակազմի ինստիտուտը: Այս մասին հաղորդում է Reuters գործակալությունը՝ վկայակոչելով ԱՄՆ գործող և նախկին բարձրաստիճան պաշտոնյաներին:
Գործակալության տվյալներով՝ Ռազմավարական հետազոտությունների ռուսական ինստիտուտը, որը վերահսկում է նախագահ Վլադիմիր Պուտինը, մշակել է ԱՄՆ նախագահական ընտրություններին միջամտելու ծրագիր՝ հօգուտ Դոնալդ Թրամփի: Աղբյուրները հիմնվում են ռուսական ինստիտուտի երկու գաղտնի փաստաթղթերի վրա, որոնք հիմք ընդունելով, ԱՄՆ հետախուզական ծառայությունը նման եզրահանգման է եկել:
Նշվում է, որ ինստիտուտը ղեկավարում է ռուսական հետխուզության նախկին աշխատակից, որը նշանակվել է Կրեմլի կողմից: Ամերիկացի պաշտոնյաների խոսքով՝ առաջին փաստաթուղթը Կրեմլին խորհուրդ է տվել քարոզչական գործունեություն սկսել սոցցանցերում և պետական ԶԼՄ-ներում, որպեսզի ամերիկացիներին դրդի ընտրել նախգահի, որն ավելի մեղմ դիրքորոշում կունենա Ռուսաստանի հանդեպ, քան Բարաք Օբաման:
Երկրորդ փաստաթղթում ասվել է, որ ընտրություններում, ըստ ամենայնի, կհաղթի Դեմոկրատական կուսակցության թեկնածու Հիլարի Քլինթոնը: Այդ իսկ պատճառով փատաթուղթը խորհուրդ է տվել դադարեցնել քարոզը հօգուտ Թրամփի և փոխարենը ընտրություններում կեղծիքների մասին լուրեր տարծել՝ Քլինթոնի հեղինակությանը վնասելու նպատակով: