«Յուրի Խաչատուրովի նշանակումը ՀԱՊԿ գլխավոր քարտուղարի պաշտոնում այլ նպատակներ ունի։ Եթե Ռուսաստանը նորից ինչ-որ խնդիրներ ունենա Միացյալ Նահանգների կամ Թուրքիայի հետ՝ այդ նշանակումը շատ էական կլինի Մոսկվայի համար։ Էական է, որ ԱՊՀ շրջանակներում, այսպես կոչված, միասնություն ստեղծվի, որովհետև վերջին ամիսներին Բելառուսի, Ղազախստանի հետ կային խնդիրներ։ Եվ Հայաստանի ներկայացուցչի նշանակումը պետք է մեջտեղ բերվեր, դա սանդղակ է, չափանիշ՝ ստուգելու այդ երկրների վերաբերմունքը»,- «Առաջին լրատվական»-ի հետ զրույցում նման տեսակետ հայտնեց ՌԱՀՀԿ տնօրեն Մանվել Սարգսյանը։
Մանվել Սարգսյանի խոսքով՝ այս նշանակումը Հայաստանի համար դրական լինել չի կարող. «Իհարկե, վատ է, այն առումով, որ Հայաստանի խնդիրները նորից օգտագործվում են այլ երկրների հետ հարաբերություններ պարզելու համար. դա՝ մի կողմից, մյուս կողմից՝ Խաչատուրովն իրեն շատ վատ դրսևորեց ապրիլյան պատերազմի ժամանակ. երբ նրա ստորագրությամբ զինադադար կնքվեց Մոսկվայում՝ ի վնաս Հայաստանի ու Ղարաբաղի և հօգուտ Մոսկվայի ու Ադրբեջանի։ Թե նա հիմա ինչպես կդրսևորի իրեն՝ չգիտեմ, ամեն դեպքում նրա հայտարարություններից կարելի է եզրակացնել, որ նա Ռուսաստանի շահերից է գործելու»,- ասաց Մանվել Սարգսյանը։
Փորձագետը հավելում է, որ Հայաստանի համար սա մի նոր «հնարավորություն է» ներքաշվելու Ռուսաստանի խնդիրների մեջ. «Հայաստանն իր սուվերենությունը կորցնում է այս հարցերում և մեծ վտանգների մեջ ներքաշվում»։
Միևնույն ժամանակ Մանվել Սարգսյանը չի կարծում, թե Յուրի Խաչատուրովի նշանակումը ՀԱՊԿ գլխավոր քարտուղարի պաշտոնում համաձայնեցված էր Ադրբեջանի հետ. «Տվյալ դեպքում, կարծում եմ, համաձայնեցված չէր, ընդհակառակը։ Ղազախստանին ու Բելառուսին պարտադրված էր ընտրություն կատարել՝ նրանք էլ կատարեցին այդ ընտրությունը։ Եթե չանեին՝ Ռուսաստանի հետ շատ ավելի մեծ հակադրություն կլիներ։ Կարծում եմ՝ տվյալ պահին նույնիսկ արհամարհեցին Ադրբեջանին, որովհետև իրենց համար իսկապես բարդ իրավիճակ էր»։
