Միացյալ Նահանգների հրթիռային հարվածները Սիրիայի ալ-Շուայրաթ ավիաբազային՝ ի պատասխան Իդլիբում ենթադրաբար կառավարական ուժերի կողմից քաղաքացիական բնակչության դեմ քիմիական զենքի կիրառման, Թրամփի հայտն է առ այն, որ ինքը ուժեղ և վճռական նախագահ է: «Առաջին լրատվական»-ի հետ զրույցում այսպիսի կարծիք հայտնեց ռուսաստանցի արևելագետ, Մերձավոր Արևելքի ինստիտուտի նախագահ Եվգենի Սատանովսկին:
«Սա Թրամփի հայտն է, որ ինքը ուժեղ և վճռական նախագահ է: Սիրիան պարզապես նրա ձեռքի տակ ընկավ»,- մեկնաբանեց Սատանովսկին:
Հարցին՝ այս իրադարձությունները ինչպե՞ս կանդրադառնան ԱՄՆ-ի ու Ռուսաստանի հարաբերությունների վրա, արևելագետը պատասխանեց, որ «ԱՄՆ-ի հանդեպ վստահությունը Ռուսաստանում մոտ է զրոյին՝ դրանից բխող բոլոր հետևանքներով»:
Ինչ վերաբերում է սիրիական հակամարտության սրացման հնարավոր ազդեցություններին Հարավային Կովկասի տարածաշրջանի և, մասնավորապես, Հայաստանի ու Ղարաբաղյան հակամարտության վրա, Սատանովսկին կարծում է, որ այս ամենը որևէ կապ չունի ո՛չ Հայաստանի և ոչ էլ Լեռնային Ղարաբաղի հետ:
Այս համատեքստում փորձագետը անդրադարձավ նաև հարցին, թե Սիրիայի դեմ ամերիկյան ռազմական գործողությունները և Թուրքիայի հրապարակային աջակցությունը ԱՄՆ-ին ինչպե՞ս կազդեն ռուս-թուրքական հարաբերությունների վրա, և որքանո՞վ են ընդհանրապես ռուս-թուրքական հարաբերությունները ազդում Հայաստանի անվտանգության միջավայրի վրա:
«Թուրքիայի հանդեպ վստահությունը Ռուսաստանում ավելին չէ, քան ԱՄՆ-ի հանդեպ: Նույնիսկ ավելի քիչ է: Սակայն ինչպես Ադրբեջանի, այնպես էլ Հայաստանի հետ Ռուսաստանի հարաբերությունները կախված չեն Թուրքիայի հետ իր հարաբերություններից»,- նշեց Եվգենի Սատանովսկին: