Ֆուտբոլի Եվրոպայի լիգայի խաղարկության քառորդ եզրափակչի առաջին մրցավեճում վաղը «Մանչեսթեր Յունայթեդը» Բրյուսելում կմրցի «Անդերտեխտի» հետ:
Անդրադառնալով առաջիկա հանդիպմանը՝ Ժոզե Մոուրինյոն հայտարարել է, որ իր թիմում բացակայում է «մարդասպանի» բնազդ ունեցող հարձակվողը: Ըստ պորտուգալացու՝ դա է պատճառը, որ իր թիմը Անգլիայի Պրեմիեր լիգայում 12 ոչ-ոքի է խաղացել և հնարավորություն չունի չեմպիոնի կոչման համար պայքարելու: «Մեր կիսապաշտպանների մոտ այնքան էլ լավ չի ստացվում վճռական հարվածը: Մխիթարյանը, Պոգբան, և Մարսիալը կրեատիվ ֆուտբոլիստներ են: Այս տղաները ստեղծում են գոլային պահեր, բայց մրցակցի դարպասի մոտ նրանց «մարդասպան» չեմ կարող անվանել: Բերեմ պարզ օրինակ: Հաշվի առնելով մեր խաղաոճը՝ Խավյեր Հերնանդեսը տնային հանդիպումներում մրցաշրջանի ընթացքում հեշտությամբ 20 գոլ կխփեր, նույնիսկ եթե մասնակցեր մրցավեճերի վերջին 10-20 րոպեներին: Նա սովորական խաղացող է, բայց բնության կողմից օժտված է մարդասպանի բնազդով: Տուգանային հրապարակում գնդակը հասնում է նրան՝ բում և գոլ: Օդից եկած գնդակին էլ հասնում է առաջինը և կրկին գոլ խփում: Մեզ այդպիսի ֆուտբոլիստներ են հարկավոր»,- ասել է Մոուրինյոն:
Հիշեցնենք, որ Խավյեր Հերնանդեսը՝ Չիչարիտոն, 2010-2015 թվականներին հանդես է եկել «Մանչեսթեր Յունայթեդում» և 103 հանդիպումներում խփել է 37 գնդակ: Ու չնայած «Մանչեսթեր Յունայթեդը» ունի «մարդասպանի» պակաս՝ Մոուրինյոն հույս է հայտնել, որ իրենք պատրաստ են հաղթել «Անդերլեխտին» և առաջիկայում նվաճել Եվրոպայի լիգայի գավաթը:
Անգլիայի Պրեմիեր լիգայի 32-րդ տուրի «Սանդերլենդի» հետ հանդիպման համեմատ՝ «Յունայթեդի» կազմում որոշակի փոփոխություններ են սպասվում: Մասնավորապես, եզրային պաշտպան Դարմիանի փոխարեն կխաղա Վալենսիան: Ամենայն հավանականությամբ, հիմնական կազմում չի լինի նաև Լինգարդը, ով «Սանդերլենդի» դեմ այնքան էլ հաջող չխաղաց և փոխարինվեց: Նրա փոխարեն խաղադաշտ դուրս կգա թիմի ավագ Կարիկը: Առջևի գծում Իբրահիմովիչի հետ կգործեն Հենրիխ Մխիթարյանն ու Մարկուս Ռեշֆորդը: Վերջինը «Սանդերլենդի» դեմ փոխարինման դուրս գալով՝ գոլի հեղինակ դարձավ, ինչը ստիպում է ենթադրել, որ Մոուրինյոն նրան կրկին հիմնական կազմում կընդգրկի: Վալենսիայի խաղադաշտում լինելու դեպքում Մխիթարյանը սովորաբար խաղում է կիսապաշտպանության աջ եզրում: Հավանական է, որ Բրյուսելում Ռեշֆորդը գործի կիսապաշտպանության՝ ձախ, իսկ Մխիթարյանն աջ եզրում:
Նկատենք, սակայն, որ «Սանդերլենդի» հետ մրցավեճում Հայաստանի հավաքականի ավագը մրցակցի դարպասը գրավեց ձախ, իսկ Ռեշֆորդը աջ գոտուց:
Ըստ բրիտանական պարբերականների՝ «Անդերլեխտի» դեմ «Յունայթեդը» կխաղա 4-3-3 խաղային դասավորությամբ: Նշենք, որ «Անդերլեխտը» վերջին շրջանում կայուն և արդյունավետ ֆուտբոլ է ցուցադրում: Բելգիայի առաջնությունում այս թիմը գլխավորում է մրցաշարային աղյուսակը և մոտ է չեմպիոնի կոչումը կրկին նվաճելուն: Եվրոպայի լիգայի ընթացիկ խաղարկությունում «Անդերլեխտը» վերջին 6 հանդիպումներից 5-ում հաղթանակ է տարել: Ավելին՝ 5 հանդիպումներում բելգիական թիմը խփել է երկու և ավելի գնդակներ: 1/16-րդ եզրափակչում «Անդերլեխտը» պայքարից դուրս է թողել Սանկտ Պետերբուրգի «Զենիթին», իսկ 1/8-րդ եզրափակչում՝ կիպրական «ԱՊՕԷԼ»-ին:
Բուքմեյքերական ընկերությունները վաղը կայանալիք մրցավեճում ֆավորիտ են համարում «Մանչեսթեր Յունայթեդին»: Վերջինի հաղթանակը գնահատված է 2, ոչ-ոքին՝ 3.45, իսկ դաշտի տերերի հաղթանակը՝ 3.8 գործակցով: Բուքմեյքերները այս մրցավեճում ամենաբարձրը գնահատել են Զլատան Իբրահիմովիչի գոլ խփելու հնարավորությունը՝ սահմանելով 1.97 գործակից: Բավական բարձր է գնահատված նաև Մարկուս Ռեշֆորդի գոլ խփել հնարավորությունը՝ 2.34 գործակից: Հենրիխ Մխիթարյանի հաջողության հասնելը բուքմեյքերները գնահատել են 2.66 գործակցով: «Անդերլեխտ»-«Մանչեսթեր Յունայթեդ» հանդիպումը կսկսվի Երևանի ժամանակով 23:05-ին:
