Ռուսաստանի եւ Իրանի արտաքին գործերի նախարարներ Սերգեյ Լավրովը և Մոհամադ Ջավադ Զարիֆը հեռախոսազրույց են ունեցել, որի ընթացքում պահանջել են Սիրիայի Իդլիբի նահանգում քիմիական զենքի օգտագործման վերաբերյալ անաչառ հետաքննություն անցկացնել: Զրույցը կայացել է իրանական կողմի նախաձեռնությամբ:
Այդ մասին հայտնում է ria.ru-ն՝ հղում կատարելով Ռ Դ դիվանգիտական գերատեսչությանը:
«Լավրովը և Զարիֆը հորդորել են անցկացնել Սիրիայի Իդլիբի նահանգում տեղի ունեցած միջադեպի մանրակրկիտ ու անաչառ հետաքննություն, որը բազմաթիվ զոհերի է հանգեցրել խաղաղ բնակչության շրջանում»,-նշել են նախարարությունում:
«Քննարկվել է Սիրիայի ավիաբազային ԱՄՆ-ի հասցրած հրթիռահարվածից հետո այդ երկրում ստեղծված իրադրությունը,-հայտնել են ԱԳՆ-ում:-Երկուստեք ընդգծվել է, որ ինքնիշխան անկախ պետության դեմ նմանօրինակ ագրեսիվ գործողությունները միջազգային իրավունքի, նախևառաջ, ՄԱԿ-ի Կանոնադրության կոպիտ խախտում է, դրանք սպառնալիք են ստեղծում տարածաշրջանային անվտանգության համար, վնասում միջազգային ահաբեկչության դեմ մղվող պայքարին»:
Ավելի վաղ Իրանի նախագահ Հասան Ռուհանին, հայտարարել էր, որ ՌԴ-ին մի քանի դյույմ էր բաժանում ԱՄՆ-ի հետ առճակատումից՝ վերջինիս կողմից սիրիական «Շայրաթ» օդակայանին հասցված հարվածի պատճառով:
