Վրաստանի ԱԳՆ-ը դատապարտել է Հարավային Օսիայում այսօր անցկացվող նախագահական ընտրություններն ու հանրաքվեն՝ անվանելով դրանց «ոչ լեգիտիմ»։ Այս մասին հայտնում է TASS գործակալությունը։
«Վրաստանի ԱԳՆ-ը դատապարտում է օկուպացված Ցխինվալիի տարածաշրջանում այսօր անցկացվող այսպես կոչված նախագահական ընտրություններն ու հանրաքվեն»,-ասվում է հայտարարությունում։ «Համաձայն միջազգային իրավունքի նորմերի՝ ցանկացած այսպես կոչված ընտրություններ կամ հանրաքվե Վրաստանի օկուպացված տարածքներում հանդիսանում են անօրինական և չեն ունենա որևէ իրավական հետևանք»,-ասվում է ԱԳՆ հայտարարությունում։
Հարավային Օսիայում անցկացվող ընտրություններն ու հանրաքվեն Վրաստանի ԱԳՆ-ն անվանել է «երկրի միջազգայնորեն ճանաչված սահմաններում Վրաստանի տարածքային ամբողջականությունը կոպիտ խախտող»՝ հատկապես նշելով դրանց «սադրիչ բնույթը»։
Հայտարարությունում ասվում է, որ Վրաստանի հնագույն տարածաշրջանի անվանումը փոխելու փորձն ուղղված է Ցխինվալիի տարածաշրջանի անօրինական բռնակցման համար հիմք նախապատրաստելուն։
«Ռուսաստանի նման գործողությունները նպատակաուղղված խոչընդոտում են հակամարտության խաղաղ կարգավորման միջազգային ջանքերին, այդ թվում Ժնևյան քննարկումների շրջանակում»,-ասվում է հայտարարությունում։
Վրաստանի ԱԳՆ-ը խնդրում է միջազգային հանրությանը համապատասխան գնահատական տալ ապօրինաբար անցկացվող ընտրություններին ու հանրաքվեին և կոչ անում ՌԴ-ին հարգել միջազգային իրավունքի հիմնարար սկզբունքները և դուրս բերել զինված ստորաբաժաումները Ցխինվալի տարածաշարջանից։