Ստոկհոլմում տեղի ունեցած ահաբեկչության գործով ձերբակալված 39-ամյա տղամարդու մոտ Ուզբեկստանի անձնագիր է հայտնաբերվել։ Ինչպես գրում է Aftonbladet թերթը՝ կասկածյալը համակրանք է արտահայտել ԴԱԻՇ-ին։ Իր ֆեյսբուքյան էջում նա զետեղել էր ծայրահեղականների քարոզչական նյութեր, ինչպես նաև հավանել 2013-ին Բոստոնի մարաթոնի ժամանակ տեղի ունեցած ահաբեկչության հետևանքների լուսանկարները։
Ավելի վաղ հաղորդվել էր, որ ձերբակալվածը, ում անունը չի հաղորդվում, խոստովանել է պատասխանատվությունը կատարվածի համար։ Ներկայում քննությունը փորձում է պարզել, թե որքան ժամանակ է նա գտնվել Շվեդիայի տարածքում։
Aftonbladet-ի լրագրողների տվյալներով՝ կասկածյալը, ով աշխատում է շինարարական ոլորտում, ունի 4 երեխա։ Նրա ծանոթների վկայությամբ՝ նա երբեք չի խոսել քաղաքականության կամ կրոնի մասին՝ հետաքրքրված լինելով միայն աշխատանքով և հայրենիքում գտնվող ընտանիքն ավելի շատ գումար ուղարկելով։
Տեղեկություններ են հայտնվել նաև ահաբեկչությանը մասնակցության համար երկրորդ կասկածյալի ձերբակալության մասին։