«Առաջին լրատվական»- ի զրուցակիցն է ՌԱՀՀԿ ղեկավար Մանվել Սարգսյանը:
-Պարոն Սարգսյան, ընտրություններն արդեն անցյալում են, դրանք հատկանշական և ուշագրավ էին առավելապես նաև նրանով, որ առաջին անգամ, որպես նախընտրական գլխավոր ասելիք, հրապարակ նետվեց ղարաբաղյան հակամարտության կարգավորման թեմատիկան: Քաղաքական ուժերից մեկը՝ ՀԱԿ-ՀԺԿ դաշինքը, հանդես էր գալիս «Խաղաղություն, հաշտություն, բարիդրացիություն» կարգախոսով: Ընտրությունների արդյունքներն արդեն պարզ են: Ինչպե՞ս կգնահատեք այն փաստը, որ այս հարցը բերվեց ներքաղաքական հարթություն և ինչպե՞ս կգնահատեք արդյունքները՝ այդ քաղաքական ուժին տրված քվեն արդյո՞ք ինչ-որ բան ասում է:
-Տարիներ շարունակ իշխանական ուժերը և ընդդիմությունը ընտրությունների ժամանակ և թե ներքին թոհուբոհի մեջ խոսում էին այդ մասին: Մի մոտեցում է ստեղծվել, որ արժեր հեռու մնալ դրանից: Անգամ իրար մեղադրում էին, որ պետք չէ շահարկել, անընդհատ դա կար: Այս անգամ մի քիչ ուրիշ մոտեցում եղավ, երբ որ բացահայտ խնդիրը հայտարարվեց որպես կարևորագույն խնդիր և առաջարկվեց դրա հիման վրա կառուցել նախընտրական ծրագիր: Սա իհարկե այլ մոտեցում էր, բայց կարծում եմ, որ շատ էական էր հանրությանը հրավիրել նման զրույցի: Խնդրի լուծման հարցը կոնկրետացել է՝ ինչպե՞ս լուծել խնդիրը… Ի վերջո երբ որ ՀԱԿ ներկայացուցիչները խոսում էին, մարդիկ շատ կոնկրետ հարց էին տալիս, այո, խնդիրը պետք է լուծվի, ոչ ոք չէր ասում, որ չպետք է լուծվի, բայց ինչպե՞ս լուծել այս խնդիրը, այս հարցի պատասխանը չեղավ:
-Տեր-Պետրոսյանը հստակ պատասխանում է, որ եթե այս կերպ չլուծվի, պատերազմ կլինի:
-«Այս կերպ» ասվածը պարզ չէ, բայց ամենաէականն այդ հարցն է:
-Նա նշում է՝ տարածքներ՝ խաղաղության դիմաց:
-Այո՛, բայց ինչպե՞ս հասնել դրան: Անմիջապես ադրբեջանական կողմը պարզ ու հստակ ասաց՝ նախագահի, փոխնախագահի մակարդակով՝ ամեն ինչ հանձնե՛ք մեզ, դո՛ւրս եկեք այստեղից ու վերջ: Դրա համար ես կարծում եմ, որ ամենաէականն այն էր, որ առաջին անգամ քաղաքական գործիչ Լևոն Տեր-Պետրոսյանն ասաց, որ Ադրբեջանը երբևէ համաձայնություն չի տա Ղարաբաղի ճանաչմանը, եթե ամբողջ աշխարհն էլ ճանաչի, իրենք չեն ճանաչի: Պարզ է, դա տարիներ շարունակ ասվում էր, բոլորն էին ասում, բայց այս կոնցեպտի մեջ դա հետաքրքիր հնչեց, որովհետև խոսվում էր Մադրիդյան սկզբունքների մասին, որտեղ կենտրոնական թեզը հենց Ղարաբաղի կարգավիճակի ճանաչումն է:
-Եվ միջազգային հանրությունը, որին անընդհատ հղում էր անում Տեր-Պետրոսյանը, պետք է Ադրբեջանից պահանջեր ճանաչել Արցախի ինքորոշման իրավունքը:
-Պահանջում է: Լավրովը իր անցյալ տարվա հայտարարության մեջ, երբ պատասխանում էր ադրբեջանցու հարցին, հստակ ասաց, որ մինչև կարգավիճակի հարցը վերջնական չլուծվի, ընդհանրապես տարածքային խնդիրներում շարժ չի կարող լինել:
Հիմա ստացվում է, որ Հայաստանի քաղաքական ասպարեզում արդեն իսկ գիտակցվում է, որ Մադրիդյան սկզբունքները լուծման չեն բերում: Սա էական է: Այդ դեպքում ինչպե՞ս լուծել խնդիրը. ես գնահատականները լսել եմ, բայց առաջարկներ չեղան:
Հարցազրույցն ամբողջությամբ՝ տեսանյութում: