«Առաջին լրատվական»- ի զրուցակիցն է ազատամարտիկ, Օհանյան-Րաֆֆի Օսկանյան դաշինքի անդամ Սմբատ Հակոբյանը:
-Պարոն Հակոբյան, արդեն հայտնի են խորհրդարանական ընտրությունների արդյունքները և այն, թե որ ուժերն են տեղ ունենալու խորհրդարանում: Օհանյան-Րաֆֆի-Օսկանյան դաշինքը չհաղթահարեց անցողիկ շեմը: Ընդհանուր առմամբ ինչպե՞ս կամփոփեք ընտրությունների ընթացքը, արդյունքները, և ի՞նչն էր պատճառը, որ նույնիսկ անցողիկ շեմը չկարողացաք հաղթահարել:
-Մի քանի կարևոր դրդապատճառներ կան: Թիվ մեկ պատճառը, որ մեր դաշինքը չկարողացավ հաղթահարել այդ «բարիկադը», այն էր, որ ոչ միայն իշխանական կլանը ներկայացնողներն էին մեզ հարվածի տակ դրել, այլ նաև «ընդդիմադիրները», որոնց մի մասն այսօր իրենց նպատակին հասան՝ խորհրդարանում են, և այն մի մասը, որոնք «քցվեցին»՝ բառիս բուն իմաստով: Մենք՝ ազատամարտիկներով առաջարկեցինք, որ ընդհանուր քաղաքական ընդդիմադիր ճակատից հանդես գանք և քաղաքական ուժեր կային, որ չհամաձայնեցին, որովհետև գործող իշխանության հետ գնացել էին «ագավոռկեքի»: Հիմա իրենք ընդամենը «ջարդեցին» ընդդիմությունը, նաև իհարկե մեզ, հույս ունենալով, որ ամսի 2-ին իրենց «դաբրո» են տալու, գոնե 7 տոկոս ստանալու են, ու էսօր մենք տեսանք, որ քաղաքական գործիչներ կան, որ «քցվեցին», իրենք իրենց «քցեցին», որովհետև տարիներ շարունակ հանուն ժողովրդի, հանուն անվտանգ Հայաստանի կարգախոսներով էին հանդես գալիս, երբ որ եկավ այդ հանունի ժամանակը, ապրիլի 2-ին հայ ժողովրդի այն մասի համար, որն իրոք լավ հայրենիք է ուզում, նոր արժեհամակարգի պահպանում է ուզում, այդ ամբողջը մենք չկարողացանք ապահովել: Փաստացի գործող իշխանությունը ցույց տվեց, որ այսօր այս ժողովրդի համար ոչ թե վաղվա սերնդի ճակատագիրն է կարևոր, այլ 20-30 000 դրամը կամ Աստված գիտի, թե ինչքան գումարն է կարևոր: Էս ժողովուդը ցույց տվեց, որ ինքը նույն գաղթական հայն է մնացել, որին 15թ-ին իր հայրենիքից լարում էին… Ամեն ժողովուրդ իրեն արժանի իշխանություն է ընտրում:
-Պարոն Հակոբյան, իսկ գուցե ձեր առաջնորդների մեղավորությո՞ւնը կար այս առումով, գուցե ժողովուրդը չհասցրե՞ց հավատալ, որ Սեյրան Օհանյանն ընդդիմադիր քաղաքական գործիչ է կամ Վարդան Օսկանյանը Մարտի 1-ի հետ առնչություն չունի, գուցե այդ ամենը քարոզարշավի ընթացքում չհաջողվե՞ց համոզել հասարակությանը:
-Հասրակությունը հատկապես վերջին 30 տարվա ընթացքում այնքան ինչուներ, գուցեներ, հարցականներ ունի: Այնքան բան է հավաքվել աղբանոցում, որ ո՛չ մաքուրն ես կարողանում տեսնել, ո՛չ արդարը, ո՛չ անկեղծ մարդկային համակարգը, չես կարողանում տեսնես, ինչքան էլ ուզում ես: ՕՐՕ դաշինքը շատ կարճ ժամանակում կարողացավ հսկայական արդյունքի հասնել, շնորհիվ մեր քաղաքական և ազգային գործիչների՝ Օհանյանի, Օսկանյանի և Րաֆֆի, որոնք վաղուց արդեն կայացած են, վաղուց բազմիցս ապացուցել են, որ այս ժողովորդին ու այս պետականությանը նվիրված և հանուն դրա ապրող ու աշխատող մարդիկ ենք, ուղղակի ժամանակի բերումով մենք չտեսանք այն արդյունքը, ինչը որ իրականում կցանկանայինք, որովհետև կարճ ժամանակում ստեղծված քաղաքական ուժը 30 տարվա քաղաքական ուժերի կողքին էր հայտնվել, նորելուկ քաղաքական ուժի համար սա հաղթանակի նման բան է: Մենք մեր պայքարի դրոշները ցած չենք դնում, մեզ համար էականը 6-7 մանդատ ստանալը չէր, մենք ուզում էինք հաղթանակի բարիերը անցնել, չստացվեց: Մենք հայտարարում ենք, որ մեր պայքարը շարունակում ենք: Փողոցային պայքարի անհրաժեշտություն չունենք:
Հարցազրույցն ամբողջությամբ՝ տեսանյութում:
