Վրաստանի նախագահ Գեորգի Մարգվելաշվիլին շնորհավորել է երկրի քաղաքացիներին՝ պետական անկախության հանրաքվեի 26-ամյակի և երկրի առաջին նախագահ Զվիադ Գամսախուրդիայի 78-ամյակի կապակցությամբ, հայտնում է apsny.ge-ն:
«Այսօր Վրաստանը նշում է իր նոր պատմության մեջ կարևոր օր` անկախության վերականգնման հանրաքվեի օրը: Մեր բոլոր քաղաքացիներին շնորհավորում եմ այդ օրվա կապակցությամբ: Շնորհավորում եմ և Վրաստանի առաջին նախագահ Զվիադ Գամսախուրդիայի ծննդյան օրվա կապակցությամբ, ինչը մենք նույնպես նշում ենք այսօր: Նա հատուկ դեր է խաղացել անկախության վերականգնման պայքարում»,- հայտարարել է Գեորգի Մարգվելաշվիլին:
Նրա խոսքերով` Վրաստանը պարտավոր է հետաքննել առաջին նախագահի մահվան հանգամանքները:
«Մենք հստակ և միանշանակ հայտարարել ենք, որ մեր նպատակն է Վրաստանը դարձնել ժամանակակից եվրոպական պետություն, զարգացած աշխարհի ազատ և արժանի անդամ, համաշխարհային հանրությունում հաստատել նրա տեղը, ինչը պատկանում է մեր ազգին՝ նրա հին և յուրահատուկ մշակույթով: Մենք պարտավոր ենք ստեղծել ոչ միայն քաղաքական անկախություն, այլ նաև քաղաքականապես ազատ պետություն»,- հայտարարել է նախագահը, ընդգծելով, որ այդ ազատության նախապայմանը կլինի զարգացման արևմտյան ճանապարհին հավատարմությունը:
