«Առաջին լրատվական»-ի զրուցակիցն է քաղաքագետ Սերգեյ Մինասյանը:
-Պարոն Մինասյան, անդրադառնանք ղարաբաղյան հակամարտության կարգավորման հնարավորությանը: Դեսպան Ռ. Հոգլանդը Երևանում լրագրողների հետ հանդիպմանն ասաց, որ կա սեղանին դրված պլան, որը ընդունելի է կողմերի համար, բայց կան հարցեր, որոնց շուրջ դեռ պետք է բանակցել, և այն հարցին՝ դա արդյոք Լավրովյան պլանն է, թե ոչ, այդպես էլ պատասխան չտրվեց: Արդյո՞ք նոր առաջարկներ կան Մինսկի խմբի համանախագահների կողմից, թե՞ խոսքը նորից Մադրիդյան սկզբունքների մասին է:
-Գոյություն չունեցող Լավրովյան պլանը պարզապես Ռուսաստանի կողմից հետապրիլյան շրջանում դեէսկալացիային ուղղված առաջարկ է, որն իր մեջ ներառում է Կազանյան փաստաթղթի տրամաբանությունը, որն իր հերթին հանդիսանում է Մադրիդյան սկզբունքների մոդիֆիկացիա: Այս փուլում գործ ունենք Մադրիդյան սկզբունքների նոր մոդիֆիկացիայի հետ: Դրա հետ մեկտեղ, բոլորին՝ այդ թվում համանախագահներին հասկանալի է, որ եթե մենք չենք կարող իրական առաջխաղացման հասնել շփման գծում, որտեղ պետք է վստահության մեխանիզմներ կիրառվեն, որոնք հակամարտող կողմերի միջև վստահություն պետք է ստեղծեն և ստեղծեն դաշտ այլ մակարդակի՝ քաղաքական պայմանավորվածությունների համար, որը այս պահին, ենթադրվում է, որ պետք է լինի Մադրիդյան սկզբունքների տրամաբանության շրջանակներում: Կարծում եմ՝ դա նկատի ուներ ամերիկացի համանախագահը: Պարզ է, որ փորձ է արվելու տարբեր ձևերով ինչ-որ մոդիֆիկացիաներով մոտեցնել կողմերի մոտեցումները, բայց խնդիրը տեխնիկական չէ, այլ քաղաքակն: Ադրբեջանական կողմը և՛ հետապրիլյան շրջանում, և՛ այս պահին էլ փորձում է խուսափել Մադրիդյան սկզբունքների գլխավոր բաղադրիչից՝ կարգավիճակի որոշման հարցից, իսկ եթե Ադրբեջանը խուսափում է սա ընդունելուց, հայկական կողմերի համար Մադրիդյան սկզբունքների մյուս բաղադրիչները կորցնում են իրենց նշանակությունը, որովհետև եթե հայկական կողմերը գնան փոխզիջումների՝ տարածքների, փախստականների և այլ հարցերի շուրջ, ենթադրվում է, որ նաև ադրբեջանական կողմը պետք է գնա հիմնական հարցի՝ կարգավիճակի հարցի շուրջ փոխզիջման: Կարծում եմ՝ ամերիկացի նախագահը, այլ համանախագահների հետ մեկտեղ, պետք է շարունակեն աշախատել և փորձել կողմերի մոտեցումները ավելի մերձեցնել, բայց չեմ կարծում, որ մոտ ապագայում մենք կարող ենք քաղաքական պայմանավորվածության մակարդակով լուրջ առաջխաղացում ունենալ:
Հարցազրույցն ամբողջությամբ՝ տեսանյութում: