Ֆուտբոլի աշխարհի 2018 թվականի առաջնության ընտրական փուլի 5-րդ տուրից հետո ՈւԵՖԱ-ն հրապարակել է Ազգերի լիգայի խմբերի նախնական ցուցակը: Նախորդ տարի հիմնված մրցաշարը մեկնարկելու է 2018 թվականի սեպտեմբերին:
Խմբերը ձևավորվելու են աշխարհի ընթացիկ առաջնության ընտրական փուլի արդյունքների հիման վրա: ՈւԵՖԱ-ի անդամ 55 հավաքականները կբաժանվեն 4 դիվիզիոնի: Այս մրցաշարը եվրոպական հավաքականներին լրացուցիչ հնարավորություն է տալիս պայքարելու Եվրոպայի առաջնության եզրափակիչ փուլի ուղեգրի համար: Եվրոպայի առաջնության ընտրական փուլը մեկնարկելու է 2019 թվականի գարնանը:
Խմբերում առաջին և երկրորդ հորիզոնականները զբաղեցրած հավաքականները ձեռք կբերեն Եվրոպայի առաջնության ուղեգրեր, իսկ մնացած 24 թիմերն Ազգերի լիգայի շրջանակում կվիճարկեն 4 ուղեգրերը: Ազգերի լիգայում հաջող հանդես եկող հավաքականները կբարձրանան մեկ դիվիզիոնով, իսկ անհաջողության մատնվածները՝ կնահանջեն:
Ֆուտբոլի Հայաստանի ազգային հավաքականը մինչև Ղազախստանի հետ հանդիպումը տեղ էր զբաղեցնում 4-րդ՝ ամենաթույլ ենթախմբում, որտեղ ընդգրկված էին Էստոնիան, Բելառուսը, Վրաստանը, Լատվիան, Ֆարերները, Ղազախստանը, Մոլդովան, Լյուքսեմբուրգը, Մակեդոնիան, Կոսովոն, Լիխտենշտեյնը, Մալթան, Սան-Մարինոն, Ջիբրալթարը: Աշխարհի առաջնության ընտրական փուլում տարած հաղթանակներից հետո Հայաստանի հավաքականն առաջադիմել է՝ հայտնվելով 3-րդ խմբում: Այստեղ մերոնց պոտենցիալ մրցակիցներն են Հունաստանը, Ռումինիան, Սլովենիան, Իսրայելը, Սերբիան, Դանիան, Բուլղարիան, Ալբանիան, Շոտլանդիան, Մոնտենեգրոն, Նորվեգիան, Լիտվան, Կիպրոսը և Ադրբեջանը: Այս պահին կա որոշակի հավանականություն, որ Եվրոպայի առաջնության ընտրական փուլի ուղեգրի համար պայքարում Հայաստանը կարող է մրցել Ադրբեջանի ընտրանու հետ:
Նշենք, որ Ազգերի լիգայում յուրաքանչյուր խմբի հավաքականները բաժանվելու են 4 ենթախմբերի, որոնց հաղթողները անցումային խաղերով վիճարկելու են Եվրոպայի առաջնության եզրափակիչ փուլի ուղեգիրը: Հարեւան երկրում արդեն իսկ անհամբերությամբ սպասում են Հայաստանի հավաքականի հետ հնարավոր հանդիպմանը, սակայն ՈւԵՖԱ-ն այսօր հայտարարությամբ է հանդես եկել նշելով որ վիճակահանության ժամանակ կարվի այպես, որ այս երկրների հավաքականները միեւնույն խմբում չհայտնվեն: Սա նշանակում է, որ Հայաստանն ու Ադրբեջանը միմյանց հետ կարող են մրցել միայն Ազգերի լիգայի փլեյ-օֆում: Ավելի ստույգ, Հայաստան-Ադրբեջան հանդիպումը կկայանա միայն այն դեպքում, եթե երկու հավաքականներն էլ եթնախմբերում զբաղեցնեն առաջին հորիզոնականը եւ պայքարը շարունակեն անցումային փուլում:
2008 թվականի Եվրոպայի առաջնության ընտրական փուլում Հայաստանի և Ադրբեջանի հավաքականները ընդգրկված էին միևնույն ենթախմբում: Չկարողանալով ընդհանուր հայտարարի գալ հանդիպման անցկացման վայրի հարցում՝ ՈւԵՖԱ-ն ուղղակի չեղյալ համարեց այդ մրցավեճերը՝ կողմերին զրկելով միավորներից:
Նշենք, սակայն, որ ՈւԵՖԱ-ի հրապարակած խմբերը վերջնական չեն: Ազգերի լիգայի խմբերն ու ենթախմբերը կձևավորվեն այս տարվա նոյեմբերին, երբ ավարտվի աշխարհի առաջնության ընտրական փուլը:
Ի դեպ, այս պահին երկրորդ ենթախմբում են Ռուսաստանի և Ուկրաինայի հավաքականները: Ու չնայած, որ ՈւԵՖԱ-ն բացառել է նաեւ ռուսների եւ ուկրաինացիների նույն ենթախմբում հայտվելն, այնուամենայնիվ այս երկրներում ևս անհամբերությամբ սպասում են ազգային հավաքականների հնարավոր դիմակայությանը անցումային փուլում: Երկրորդ խմբում, բացի Ռուսաստանից և Ուկրաինայից, տեղ են զբաղեցրել նաև Իռլանդիան, Ավստրիան, Շվեդիան, Սլովակիան, Ուելսը, Հոլանդիան, Հյուսիսային Իռլանդիան, Չեխիան, Թուրքիան և Հունգարիան: Առաջին խմբում ընդգրկված են Գերմանիան, Ֆրանսիան, Պորտուգալիան, Բելգիան, Իսպանիան, Անգլիան, Շվեյցարիան, Իտալիան, Խորվաթիան, Լեհաստանը, Իսլանդիան, Բոսնիա և Հերցեգովինան: