ՀՀԿ-ի կողմից դպրոցներում ու մանկապարտեզներում վարչական ռեսուրսի չարաշահման 114 ձայնագրությունները հրապարակելուց հետո այսօր «Իրազեկ քաղաքացիների միավորում» ՀԿ-ն հրապարակել է պաշտոնյաների այն ցանկը, որ տնօրենները հնչեցրել են հեռախոսազրույցներում: Ցանկում կա նաև ԱԺ պատգամավոր, Շիրակի մարզից ՀՀԿ ռեյտինգային թեկնածու Սուքիաս Ավետիսյանի անունը: «Առաջին լրատվական»-ը զրուցել է ՀՀԿ Շիրակի մարզի ռեյտինգային թեկնածու Սուքիաս Ավետիսյանի հետ:
– Պարոն Ավետիսյան, Գյումրիի թիվ 1 դպրոցի տնօրենը խոստովանում է, որ իրենից պահանջված ցուցակը ներկայացրել է ՀՀԿ-ական պատգամավորության թեկնածու, Գյումրիի 2 շրջանային կազմակերպության ղեկավար Սուքիաս Ավետիսյանին։ Փաստորեն արձանագրո՞ւմ եք, որ ՀՀԿ-ն չարաշահում է վարչական ռեսուրսը:
– Ինքը Գյումրիի 2 շրջանային կազմակերպության խորհրդի անդամ է, և բնական է, որ ինքը պետք է իշխանության համար աշխատանք տանի:
– Այսինքն՝ Դուք արդարացնում եք այն խախտումները, այն վարչական ռեսուրսի չարաշահումը, որ տեղի է ունեցել:
– Ո՛չ, մենք ոչ մի վարչական ռեսուրսի չարաշահում չենք անում, մենք մեր կուսակցականների հետ ենք աշխատում: Իսկ մեր շրջանային ղեկավարները կարող են լինել և՛ վարչական աշխատողներ, և՛ մասնավոր կառույցների ղեկավարներ, և՛ անգործ մարդիկ: Այնպես որ, որևէ խնդիր այստեղ չեմ տեսնում, և վարչական ռեսուրսի որևէ չարաշահում այստեղ չկա:
– Այսինքն՝ Դուք փաստում եք, որ, այո, Գյումրիի թիվ 1 դպրոցի տնօրենին հրահանգել եք, որ ձայներ ապահովի Ձեզ համար:
– Ոչ միայն Գյումրիի թիվ 1 դպրոցի տնօրենին, այլև Գյումրիի 2 շրջանային կառույցի 20 խորհրդի անդամներին, այո՛, հրահանգել եմ, որ կուսակցականները և կուսակցական կառույցի ղեկավարները պարտավոր են կուսակցության համար աշխատել: Բա կուսակցականը էլ ե՞րբ պետք է աշխատի կուսակցության համար, եթե ոչ ընտրությունների ժամանակ: Սա կուսակցական կառույց է, այստեղ վարչական ռեսուրս գոյություն չունի, գոյություն ունեն կուսակցական ստորաբաժանումներ և նրանց ղեկավարներ: Մենք շփոթում ենք վարչական կառույցը և կուսակցական կառուցվածքային կառույցը: Եվ բացահայտում չեն արել, թող իզուր իրենց չվերագրեն, որ ինչ-որ բան են բացահայտել, դա մեր կուսակցական աշխատանքն է, որը մենք կատարում ենք: Թող իրենց կրիմինալիստի տեղ չդնեն, թե իբր բացահայտում են արել, մենք մեր կուսակցական աշխատանքն ենք կատարում և շատ հստակ ենք կատարում:
– Ձեր ձեռքի տակ ունեք ցուցակներ: Ձեզ համար որոշակիացե՞լ է, թե Դուք որքան ձայն կունենաք:
– Շիրակի մարզում և նաև Գյումրիում Հանրապետականը հաստատ ընտրողների 50 տոկոս ձայնը կունենա:
– Բայց չէ՞ որ անկանխատեսելի է Շիրակի մարզը, ամեն ընտրության ընդդիմությունը գրեթե միշտ հաղթել է:
– Շիրակի մարզը երբևէ անկանխատեսելի չի եղել, գուցե որոշ ընտրությունների ժամանակ անկանխատեսելի արդյունքներ եղել են, բայց այս անգամ հաստատ անկանխատեսելիություն չի լինի:
– Ձեր կառույցի ղեկավարը, ով նաև դպրոցի տնօրեն է, աշխատանքային ժամին է կատարել ցուցակագրում, ինչը խախտում է:
– Դպրոցի աշխատանքի ժամին չեն կատարել, աշխատանքի ժամից հետո են կատարել, և իրենք հստակ իրենց հանձնարարականները կատարել են: Եվ որպես կուսակցական շատ ճիշտ են արել, իսկ որպես վարչական աշխատողներ՝ իրենք օրենքի սահմաններում են արել, քանի որ այն, ինչ արել են, արել են ժամը 18:00-ից հետո:
– Որպես ռեյտինգային թեկնածու՝ որքա՞ն ձայն եք Դուք ակնկալում գյումրեցիներից՝ հաշվի առնելով, որ ՀՀԿ ցուցակով առաջադրված ռեյտինգային թեկնածուները քիչ չեն:
– ՀՀԿ թեկնածուները քիչ չեն, իմ շանսերն էլ վատ չեն, որովհետև ընտրողները ինձ վաղուց ճանաչում են ոչ միայն Գյումրիում, այլ նաև ամբողջ մարզում, և շատ նորմալ հանդիպումներ եմ ունենում: Արդեն մոտ 80 համայնքում հանդիպումներ եմ ունեցել, շատ լավ հանդիպումներ են, խորհուրդ կտամ մեկ-մեկ գաք, իմ հանդիպումներին մասնակցեք: