«Առաջին լրատվական»-ի զրուցակիցն է «Սասնա ծռեր» խմբի անդամներ Կյուրեղյան եղբայրների հայրը՝ Արմենակ Կյուրեղյանը:
– Պարոն Կյուրեղյան, երեկ «Սասնա ծռեր» քաղաքական խորհրդի անդամները մասնակցեցին «Հերիք է հանդուրժել անարդարությունը, հերիք է հանդուրժել թալանը, ազատություն Սամվել Բաբայանին և մյուս քաղբանտարկյալներին» կարգախոսով հանրահավաք-երթին, որը հրավիրել էր «Օհանյան-Րաֆֆի-Օսկանյան» դաշինքը: Դուք չմասնակցեցիք, ինչո՞ւ:
– Քաղաքում չէի:
– Իսկ ի՞նչ կարծիք ունեք՝ արդյոք զգո՞ւմ եք, որ սա այն քաղաքական ուժն է, որը կարող է իրագործել «Սասնա ծռերի» նպատակը:
– Համենայնդեպս, ՕՐՕ-ն միակ քաղաքական ուժն է, որ կոնկրետ ասաց, որ Սասնա ծռերը քաղբանտարկյալներ են, և կոնկրետ ասացին, որ իրենք իշխանության գալու դեպքում պետք է սատարեն և լուծեն քաղբանտարկյալների ազատ արձակման հարցերը: Խոսքերը լավ են, բայց ինձ համար կոնկրետ արարքներն ու քայլերն են կարևոր: Այդ իմաստով, կապրենք՝ կտեսնենք:
– Դուք բոյկոտում եք ընտրությունները, չեք հավատում ընտրությունների միջոցով փոփոխություններին: Հիմա ՕՐՕ-ն Ձեզ ոգեշնչե՞լ է:
– Եթե լինի կոնսոլիդացիա, և քաղաքական ուժերը միավորվեն, փորձեն ինչ-որ բան անել, դա կլինի ավելի ճիշտ: Անջատ-անջատ ընտրությունների գնալը կլինի ընդամենը մի քանի մանդատի համար պայքար, և ես դա ճանապարհ չեմ համարի: Իսկ եթե բարձրանա ժողովրդական ընդվզման մեծ ալիք, իհարկե՝ դա կարող է բան փոխել Հայաստանում:
– Կարծում եք՝ այդ կոնսոլիդացիան տեղի կունենա՞:
– Չեմ կարող կանխատեսել: Բայց կարծում եմ՝ բոլոր այն քաղաքացիները, ովքեր ուզում են ունենալ նորմալ հայրենիք, նորմալ երկիր, պետք է գործողություններով ցույց տան, որ իրոք ուզում են, և ոչ թե հեռվից հետևեն: Հեռվից հետևել՝ նշանակում է կողմնակից լինել բոլոր երևույթներին:
– ՕՐՕ-ն լայն համագործակցություն է առաջարկում «Ծառուկյան» դաշինքին: Դուք այստեղ խնդիր չե՞ք տեսնում, որ իրենք տարբեր քաղաքական ուժերի առաջարկում են համագործակցություն:
– Եթե ժողովրդական մեծ ալիք, գրավիտացիոն կենտրոնը ժողովուրդն է լինելու, և ավտոմատ բոլոր ուժերն են միանալու, երկրում ինչ-որ մի բան կփոխվի: Իսկ անհատապես որևէ մեկը միանա, մյուսը դուրս գա, դա, ըստ իս, չի օգնի ոչ մի բանի:
– Եթե ՕՐՕ-ն հաղթահարի 7 տոկոսի շեմը և մտնի ԱԺ, կհամարեք, որ նրանք օգտագործեցին «քաղբանտարկյալներ» տերմինը իրենց նպատակների համա՞ր:
– Միանշանակ նման հայտարարություններ անելը սխալ է, քանի որ կարող է ցանկություններ ունենան, բայց այդ ցանկությունները չիրականանան: Իհարկե, կան ուժեր, որոնք նաև կշահարկեն: Բայց եթե հետընտրական գործողությունների ընթացքում հետևողական քայլեր կատարեն, որ Հայաստանում չլինեն քաղբանտարկյալներ, ես կասեմ, որ իրոք այդ ուժը անկեղծ էր:
– Դաշինքի մի շարք անդամների քաղաքական անցյալը Ձեզ չի՞ մտահոգում:
– Իհարկե, մտահոգում է: Ընդհանրապես ոչ մեկս հավատաքննիչ չէ և չի կարող ասել՝ գիտեք, սա լավն է, սա վատն է, բոլոր մարդիկ գնահատվում են միայն և միայն իրենց արարքներով: Իհարկե, կան քայլեր, որոնք անելուց հետո դու այդ մարդկանց հետ ճանապարհ չես գնա: Կան այդպիսիք: Բայց կան այնպիսիները, որոնք ինչ-որ պահի եղել են ինչ-որ դիրքում, բայց ինչ-որ պահից սկսել են պայքարել և ազնիվ ճանապարհի են անցել: Եվ թող ոչ մեկն իրեն չգերագնահատի մյուսներից, չասի՝ դուք գիտեք, ես ամենաամենան եմ, իսկ դուք՝ ոչ: Ես ողջունում եմ բոլոր այն մարդկանց, ովքեր այսօր պայքարում են մեր հայրենիքի պաշտպանության համար:
– Անկախ նրանից, որ նրանք ընտրություններին մասնակցելու հա՞յտ են ներկայացրել, մինչդեռ Դուք բոյկոտում եք ընտրությունները:
– Միշտ ասել եմ, որ ընտրություններով այս իրավիճակում որևէ բան չի փոխվի, բայց եթե լինի ժողովրդական ընդվզման մեծ ալիք, եթե ընտրությունների օրը այնպիսի մի ժողովրդական ալիք բարձրանա, ոչ թե ընտրությունների միջոցով, այլ այդ ալիքի շնորհիվ իրավիճակ կփոխվի: Եվ եթե այնպիսի ալիք բարձրանա, որ կտրեն ընտրությունները կեղծողի ձեռքերը և թույլ չտան ընտրությունները կեղծել և ամրագրել այն, ինչ գոյություն ունի, այդ պահին, այդ դեպքում ինչ-որ մի բան կփոխվի: Իսկ եթե գոյություն ունի կլանների իշխանություն, ոչ մի բանի չեն հասնի: ԿԸՀ-ն էլ նույնպես կգրանցի այն արդյունքները, ինչ իրենց պետք է:
– Անձամբ կմասնակցե՞ք ընտրություններին:
– Ընտրություններին մասնակցելու հարցը այս պահի դրությամբ ինձ մոտ դեռ բացասական է, և եթե ընտրությունների օրը այդպիսի համաժողովրդական ալիք բարձրանա, արժե մտածել՝ օժանդակե՞լ, թե՞ ոչ: Իսկ այսօրվա դրությամբ մասսայական և շարունակական բռնություններ են տեղի ունենում, մենք տեսանք դպրոցի տնօրենների ձայնագրությունները, և պարզ է դառնում, որ որևէ մեկը չի պատժվելու: Այսինքն՝ ընտրական գործընթացն արդեն խախտված է: Ի՞նչ ընտրությունների մասին է խոսքը: Այս իրավիճակից դուրս գալու միակ ելքն այն է, որ բոլոր առողջ քաղաքական ուժերը և ժողովուրդը միավորվեն, մեկ ճակատ կազմեն և փոխեն իրավիճակը: Ուրիշ բանի ես չեմ մասնակցելու:
