Անդադառնալով դիտարկմանը, որ նախաձեռնվել է ՀՀԿ կուսակցության գրանցումը առաջիկա ընտրություններին չեղարկելու գործընթաց՝ «Առաջին լրատվական»- ի հետ զրույցում ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը նշեց, որ «Իրազեկ քաղաքացիների միավորում» ՀԿ կողմից ձեռք բերված և փաստագրված տվյալները հիմք են հանդիսանում, որպեսզի նման պահանջ առաջադրենք:
«Այսինքն՝ հասարակական պահանջի ձևավորման խնդիրն ունենք, որովհետև որպես ՀՀ քաղաքացի, որպես ՀԿ ներկայացուցիչ և որպես դիտորդական առաքելություն իրականացնող կազմակերպություն մենք իրավական լծակներ չունենք այդ հարցը ԿԸՀ ներկայացնելու, բայց հանրային պահանջի ձևավորում՝ ուղղված ազատ և արդար ընտրությունների համար անհրաժեշտ նախապայմանների ստեղծմանը, մենք կարող ենք իրականացնել և հենց դա ենք անում»,- նշեց իրավապաշտպանը:
Նրա խոսքով՝ առաջին հարցն ուղղված է ԱԺ ընտրություններին մասնակցող կուսակցություններին և դաշինքներին, որ դիմեն ԿԸՀ, որպեսզի վերջինս հայցադիմում ներկայացնի դատարան և ՀՀԿ-ին հանի գրանցումից, որպեսզի ՀՀԿ-ն չմասնակցի ընտրություններին:
Ա. Սաքունցն ընդգծեց, որ ՀՀԿ-ն չարաշահել է վարչական ռեսուրսները և դա ունի համակարգային բնույթ, ինչը էականորեն ազդելու է քվեարկության արդյունքների վրա:
Իրավապաշտպանի խոսքով՝ ուսումնասիրության ընթացքում հեռախոսազանգերը կատարվել են աշխատանքային ժամերի ոչ թե դրանից հետո: «Ակնհայտորեն կեղծիք է, որ ցանկանում են հարցը սահմանափակել միայն մանկապարտեզների և դպրոցների տնօրեններով, մինչդեռ նրանք ցուցակները ներկայացրել են մարզպետարաններ, քաղաքապետարաններ, թաղապետարաններ, որոնք վարչական մարմիններ են: Այսինքն՝ հրահանգը գնացել է վարչական մարիններից: Դա հանդիսանում է վարչական ռեսուրսի չարաշահում: Միայն իշխանություն ունեցող քաղաքական ուժը կարող է վարչական ռեսուրսը չարաշահել: Եվ գիտակցաբար անգրագետ ձևանալը միակ տարբերակն է անհարմար վիճակից դուրս գալու համար»,- նշեց Ա. Սաքունցը:
Ա. Սաքունցի խոսքով՝ եթե ՀՀԿ-ն մասնակցի ԱԺ ընտրություններին, արդեն իսկ այդ ընտրությունները պետք է համարել ոչ ազատ և ոչ արդար:
«Պետք է պաշտոնական դիրքի չարաշահման հիմքով քրեական գործ հարուցվեր, թե չէ այս ամբողջ պատկերը թողած՝ խնդիրը մասնավորեցնելը մանկապարտեզի կամ դպրոցի տնօրենի մակարդակի, ես համարում եմ ոչ թե իրավական անգրագիտություն, այլ գիտակցված անմեղսուանկություն՝ հանուն Սերժ Սարգսյանին ծառայություն մատուցելու»,- ընդգծեց Ա. Սաքունցը:
Մանրամասները՝ տեսանյութում: