«Մենք մոտենում ենք ընտրաշավի ավարտին, ևս մեկ շաբաթ և արդեն կձևավորվի նոր իշխանություն: Կարծում եմ, որ գիտակցությունը, որ ԱԺ ընտրություններով ձևավորվելու է երկրի ամբողջական իշխանությունը, քայլ առ քայլ, բայց այդուհանդերձ դարձավ հասարակական գործընթացի մասնակից բոլոր ուժերի ջանքերի շնորհիվ:
Նախընտրական քարոզարշավի օրակարգում այսօր խոսվում է փոփոխությունների անհրաժեշտության մասին. դա շատ կարևոր առանձնահատկություն է: Լավատեսության հիմք է տալիս այն հանագամանքը, որ բոլոր դերակատարները, այդ թվում նաև քաղաքական մեծամասնությունը խոսում են փոփոխությունների անհրաժեշտության մասին, իսկ դա նշանակում է, որ անկախ ընտրության արդյունքներից՝ նոր ձևավորված իշխանությունը պարտավոր է սպասարկել այդ փոփոխությունների անհրաժեշտությունը: Այս մասին «Առաջին լրատվական»- ի հետ զրույցում ասաց ՀՀԿ խմբակցության պատգամավոր Սամվել Ֆարմանյանը:
Նրա գնահատմամբ՝ նախընտրական այս փուլում քաղաքական դիսկուրս չկա, այդուհանդերձ դա չի նշանակում, թե տարբեր հարցերի լուծման հետ կապված հետաքրքիր մտքեր չեն շրջանառվում:
Անդրադառնալով հետընտրական փուլում ներքաղաքական հնարավոր զարգացումներին՝ Ֆարմանյանը նշեց, որ հեռու է այն մտքից, թե որոշ ուժեր իշխանությունը վերցնելու համար կմեկտեղեն ռեսուրսները:
Ս. Ֆարմանյանը կարծում է, որ այս ընտրությունները մեր երկիրը ավելի դիմադրողունակ կդարձնեն: Նա նաև նշեց, որ Արցախում ՀՀ նախագահը, որպես ԶՈՒ Գերագույն գլխավոր հրամանատար, փորձեց այն ուղերձը փոխանցել հանրությանը, որ ապրիլի 2-ին մենք նաև ընտրում ենք, թե ում ենք վստահելու մեր երկրի պաշտպանությունը, ում ենք վստահելու պատերազմի և խաղաղության հարցերում պատասխանատվությունը:
«Փոխզիջումների հիման վրա Արցախի խնդրի կարգավորման այն փիլիսոփայությունը, որ պատկերացնում ենք մենք, որևէ կերպ կասակծի տակ չի առնում Արցախի Հանրապեության ժողովրդի հիմնարար իրավունքը ինքնուրույն տնօրինելու սեփական ճակատագիրը և ինքնուրույն որոշելու: Հակամարտության հետևանք հանդիսացող մնացած բոլոր խնդիրներն ածանցյալ են և իրենց պատասխանները պետք է ստանան հակամարտության կարգավորման համապարփակ ծրագրի շրջանակներում, մի նպատակ, որին ուղղված է եղել նախագահ Ս. Սարգսյանի առաջնորդության 10 տարիների ընթացքում բանակցային ողջ գործընթացը և անտեղ մենք ունեցել ենք հաջողություն»,- նշեց Ֆարմանյանը:
Մանրամասները՝ տեսանյութում:
