2018 թվականի Ֆուտբոլի աշխարհի առաջնության ընտրական փուլի 5-րդ տուրում մեր հարևան երկրներից Վրաստանի և Ադրբեջանի հավաքականները սեփական հարկի տակ անհաջողության մատնվեցին: Վրացիները Թբիլիսիում 1:3 հաշվով զիջեցին Սերբիային, իսկ ադրբեջանցիները՝ 1:4 հաշվով Գերմանիային:
Փաստորեն, Բաքու-Թբիլիսի-Երևան կտրվածքով նախընտրական այս տուրում հաղթանակ գրանցվեց միայն Երևանում. մեր հավաքականը 2:0 հաշվով հաղթեց Ղազախստանին:
«Դուք ունեք ուժեղ հավաքական: Ունեք Մխիթարյան, ով իր ետևից է տանում թիմը: Մենք հիանում ենք ձեր խաղով: Դիտել եմ Հայաստան-Ղազախստան հանդիպումը և կարծում եմ, որ հայերի հաղթանակը օրինաչափ էր: Ղազախները չդիմանալով ճնշմանը՝ կոպիտ խաղով փորձում էին չեզոքացնել վտանգը: Եթե խաղի սկզբում չլիներ 10 համարի վնասվածքը, առաջին կեսում Հայաստանը կվճռեր հանդիպման ելքը»,- «Առաջին լրատվական»-ի հետ զրույցում ասաց վրացի ֆուտբոլային վերլուծաբան Գեորգի Խունջուկաշվիլին:
Վերջինիս հավաստմամբ՝ վրացի երկրպագուները մշտապես հետաքրքրված են թե Հայաստանի և թե Ադրբեջանի հավաքականի ելույթներով: «Ինչ խոսք, ուրախալի է, երբ հարևան երկրի հավաքականը հաղթում է: Վրաստանի համար ընտրական այս փուլն ավարտված կարելի է համարել: Հայերն ու ադրբեջանցիները հնարավորություն ունեն աշխարհի առաջնության եզրափակիչ փուլի համար պայքարելու: Հայաստանը թե կազմով և թե կարգով այսօր ամենաուժեղն է և իրական հնարավորություն ունի խմբում երկրորդ տեղը գրավելու: Ադրբեջանը վերջին երկու տարիներին վերելք է ապրել, բայց նրանց ցուցադրած խաղում բացակայում է կայծը, սրությունը: Ինչ վերաբերում է մեր հավաքականին, ապա ներկայիս վիճակը կարող եմ նկարագրել մեկ բառով՝ անմխիթար: Նախորդ շրջափուլում Հայաստանը հրաշքով չհաղթեց սերբերին: Եթե իրացնեիք 11 մետրանոց հարվածը, հաշիվը կդառնար 2:0: Ամեն դեպքում 1:1 հաշիվը ևս նորմալ էր: Մենք սերբերին պարտվեցինք 1:3 հաշվով: Հայերի չափ էլ չկանք: Անանիձեն դեռևս պատրաստ չէ իր ետևից տանել տղաներին: Մեծ հույսեր էինք կապում Թոնրիկե Օրիաշվիլիի հետ, սակայն նա ծանր վնասվածք է ստացել: Հայտնի չէ թե շարք վերադառնալուց հետո Թոնրիկեն ինչ մակարդակի ֆուտբոլ կցուցադրի»,- հավելեց մեր զրուցակիցը:
Նրա համոզմամբ՝ Հայաստանի և Վրաստանի հավաքականները պետք է տարին գոնե երկու անգամ ընկերական հանդիպում անցկացնեն, ինչը միայն դրական ազդեցություն կունենա կողմերի համար: «Մեր հավաքականները խաղաոճով նման են: Թե հայերը և թե վրացիները տեխնիկապես լավ են պատրաստված: Այդ իսկ պատճառով հարևան երկրների միջև ֆուտբոլային դիմակայությունները միշտ լարված և դիտարժան ընթացք են ունենում: Այսօր մենք ստուգողական հանդիպում ենք անցկացնելու Լատվիայի հետ: Շատ ավելի լավ կլիներ, եթե Թբիլիսիում մրցեին Հայաստանն ու Վրաստանը: Ֆուտբոլասերների համար դա իրական ֆուտբոլային տոն կլիներ: Նույնիսկ չեմ հիշում՝ վերջին անգամ երբ են մրցել Հայաստանն ու Վրաստանը: Հարևանները պետք է սերտորեն համագործակցեն նաև սպորտի ասպարեզում»,- կարծում է Խունջուկաշվիլին:
Նշենք, որ վրացական ԶԼՄ-ները պարբերաբար անդրադառնում են թե Հայաստանի հավաքականի և թե Հենրիխ Մխիթարյանի ելույթներին: Ադրբեջանական լրատվամիջոցները Հայաստանի ազգային հավաքականի մասին գրում են, երբ մեր ֆուտբոլիստներն անհաջողության են մատնվում: Հայաստան-Ղազախստան հանդիպման մասին հարևան երկրում որևէ տեղեկատվություն չի եղել: Սպորտային կայքերում նույնիսկ չի նշվում, որ նման հանդիպում է տեղի ունեցել:
Ինչևէ, 5 հանդիպումներում վաստակելով ընդամենը 2 միավոր՝ Վրաստանի հավաքականը ընտրական D ենթախմբում նախավերջին՝ 5-րդ հորիզոնականում է և զրկվել է եզրափակիչ փուլի ուղեգրի համար պայքարելու հնարավորությունից: Ադրբեջանի ազգային թիմը 5 խաղում վաստակել է 7 միավոր, ընտրական C ենթախմբում այս պահին 4-րդ հորիզոնականում է: Երկրորդ հորիզոնականում գտնվող Հյուսիսային Իռլանդիային ադրբեջանցիները զիջում են 3 միավորով և պահպանում են հնարավորություն աշխարհի առաջնության եզրափակիչ փուլի ուղեգրի համար:
