Տնտեսական հարցերի փորձագետ Գեորգի Խուխաշվիլին կարծում է, որ գլխավոր գազատարը Հայաստանին փոխանցելը ռազմավարական սխալ կլինի,- տեղեկացնում է REGNUM գործակալությունը: Նա մեկնաբանել է գործակալության հայտարարությունն այն մասին, թե Հայաստանը ցանկություն է հայտնել գնել Վրաստանով անցնող գազատարի հատվածը, որով Ռուսաստանը գազ է մատակարարում Հայաստանին։ Խուխաշվիլիի խոսքերով, գլխավոր գազատարի հատվածը Հայաստանին կամ Ռուսաստանին փոխանցելը կարող է տարածաշրջանում Վրաստանի կողմից որոշակի քաղաքական լծակների կորուստ նշանակել, իսկ ոչ բարեկամներին լուրջ սադրանքների հնարավորություն կտա։ «Դա Հայաստանի հետ փոխըմբռնման որոշակի մեխանիզմ է և հիշեցում այն մասին, որ մեր քաղաքական գործընկերությունը պետք է շարունակվի, իսկ Հայաստանում «տաք գլուխներում» վատ մտքեր չպետք է ծագեն։ Այդ հանգամանքը հաշվի առնելով՝ Ռուսաստանը ևս ձեռքով-ոտքով կապված կլինի, քանի որ Հայաստանին գազ մատակարարելը կարևոր է նաև նրա համար։ Դրանից ելնելով՝ գազատարը Հայաստանին կամ Ռուսաստանին փոխանցելը ռազմավարապես անթույլատրելի է»,- նշել է Գ. Խուխաշվիլին։ Ինչ վերաբերում է Ադրբեջանին կամ որևէ այլ երկրի, ապա Խուխաշվիլիի կարծիքով, եթե խաղի կանոնները համաձայնեցվեն, և գազատարը նրանց հետ միասին ղեկավարեն նաև վրացական իշխանությունները, ապա դրանում վատ բան չի լինի։ Նրա խոսքերով, գոյություն ունեն շահագործման միջազգային ստանդարտներ, որոնք Ադրբեջանը չի խախտի։
