Մոտ 1400 երեխա է սպանվել Եմենում զինված հակամարտության երկու տարում։ Այս մասին հայտնել է մարդասիրական հարցերով ՄԱԿ-ի գլխավոր քարտուղարի տեղակալ Ստիվեն Օ՝ Բրայենը, ով հանդես է եկել գրավոր հայտարարությամբ՝ Եմենի կառավարության և ապստամբների միջև դիմակայության մեկնարկի երկրորդ տարելիցի առիթով։
«Չնայած բանակցությունների միջոցով հակամատության համապարփակ կարգավորմանն ուղղված միջազգային ջանքերին, ռմբակոծությունների որոտը և հրետանային կրակոցները, փամփուշտների սուլոցը դարձել են Եմենում առօրյա կյանքի մաս։ Հազարավոր խաղաղ բնակիչներ են զոհվել, այդ թվում 1400 տղաներ ու աղջիկներ։ Նրանցից շատերն առավոտյան դպրոց են գնացել ու չեն վերադարձել։ Տասնյակ հազարավոր քաղաքացիական անձիք վնասվածքներ են ստացել»,-ասել է գլխավոր քարտուղարի տեղակալը։
Նա նշել է, որ համաձայն վերջին գնահատականներին՝ մարդասիրական օգնության կարիք ունեն մոտ 19 մլն եմենցիներ, այսինքն՝ երկրի բնակչության 2/3-ը, նրանցից 7 միլիոնին սով է սպառնում։