Չեխիայի նախագահ Միլոշ Զեմանը կոչ է արել ներգրավել ՆԱՏՕ-ն ԴԱԻՇ ահաբեկչական խմբավորման ոչնչացմանն ուղղված անմիջական մարտական գործողություններում։
«Ես արդեն մի քանի տարի արմատական իսլամիզմի դեմ պատերազմի կոչ եմ անում։ Այդ պատերազմը պետք է լինի ոչ թե խոսքի պատերազմ, այլ գործողությունների»,-ասել է նախագահը Պրահայի Frekvence-1 ռադիոյի հետ հարցազրույցում։
Նա հիշեցրել է, որ արդեն կողմ է արտահայտվել ԴԱԻՇ-ի դեմ զինված պայքարում ՆԱՏՕ-ի ներգրավմանը Վարշավայում կայացած դաշինքի գագաթնաժողովին։
«Մեր ինչի՞ն է պետք ՆԱՏՕ-ն, եթե այն չի կարող ռազմական ուժի օգնությամբ միանալ Եվրոպայից հարավ ԴԱՒՇ- դեմ պայքարին։ Դա խիզախության հարց է, որը չունեն Եվրոպայի առաջնորդները։ Այն ունի Դոնալդ Թրամփը»,-կարծում է Միլոշ Զեմանը։
Նրա խոսքով՝ փոփոխությունները կարող են տեղի ունենալ Բրյուսելում մայիսին կայանալիք ՆԱՏՕ-ի գագաթնաժողովում։ «Կտեսնենք, եթե նա (ԱՄՆ նախագահը) նույնպես առաջարկի կիրառել ՆԱՏՕ-ն ԴԱԻՇ-ի դեմ»։ «Այլապես այդ կազմակերպությունը կլինի անօգտակար, քանի որ լինում են իրավիճակներ, երբ պետք է կռվել, իսկ սա դրանցից մեկն է»,-ասել է նա։