«Առաջին լրատվական»- ի հետ զրույցում, անդրադառնալով դիտարկմանը, որ առաջիկա խորհրդարանական ընտրություններին մասնակցող ուժերից ՀՀԿ-ՀԺԿ դաշինքը, մասնավորապես Լևոն Տեր Պետրոսյանը ներքաղաքական օրակարգ են բերել ԼՂ հակամարտության հարցը և նշում են, որ պետք է Ադրբեջանի հետ խաղաղություն հաստատվի, «Ռեգիոն» հետազոտական կենտրոնի տնօրեն Լաուրա Բաղդասարյանը նշեց, որ անցած տարիների ընթացքում հայ հասարակության համար կարևոր է եղել «ոչ պատերազմին» դիսկուրսը:
«Հայաստանը միշտ վարել է «ոչ պատերազմին» քաղաքականություն, իսկ Ադրբեջանը՝ հակառակը՝ «ոչ խաղաղությանը» քաղաքականություն: Եվ դրանով է բացատրվում այն հասկացությունը, որ հայկական և ադրբեջանական կողմերը տարիներ շարունակ ապրում են «ոչ խաղաղություն, ոչ պատերազմ ռեժիմում»: Ապրիլյան պատերազմը ցնցեց այս հասարակություններին, և հայ հասարակությանը ռադիկալացրեց այնպես, ինչպես առաջին ղարաբաղյան պատերազմից անմիջապես հետո»,- նշեց Լ. Բաղդասարյանը:
Նրա կարծիքով՝ ոչ թե ՀԱԿ-ՀԺԿ դաշինքն է օրակարգ բերում, այլ ապրիլյան իրադարձություններն են խթանել և օրակարգ բերել ԼՂՀ հակամարտության խնդիրը, իսկ ՀԱԿ-ը պարզապես ձևակերպում է իր դիրքորոշումը և ցույց է տալիս իր տեսլականը այս իրավիճակից դուրս գալու վերաբերյալ:
Լ. Բաղդասարյանի կարծիքով՝ եթե կողմերից մեկը իր ձեռքին է պահում պատերազմի իրավունքը և հայտարարում է այդ մասին, իսկ մյուս կողմը ասում է, որ ինքը գնում է խաղաղության, սա պարտվողական քայլ է:
Նրա խոսքով՝ «խաղաղություն հիմա» կարգախոսը արհեստական է, որովհետև խաղաղությունը պետք է լինի բանակցությունների արդյունք: «Խաղաղություն հիմա կարգախոսով բանակցությունների գնալը նշանակում է, որ ընդունում ենք բոլոր պայմանները: Չեմ կարծում, թե ՀԱԿ-ը ԼՂՀ-ի և ՀՀ բնակչության կողմից ստացել է լիազորություններ, բացի դրանից՝ ԼՂ կարգավիճակի հարցը անհայտ մատուցներում է մնում»:
Լաուրա Բաղդասարյանի կարծիքով՝ Հայաստանից հեռանում են ոչ թե պատերազմի սպառնալիքի պատճառով, այլ անարդարության պատճառով:
Մանրամասները՝ տեսանյութում:
