Նախօրեին, կառավարության նիստի ժամանակ վարչապետ Կարեն Կարապետյանը դժգոհեց ՏԻՄ մարմինների ղեկավարների, մարզպետների աշխատանքից: «Նախորդ տարեվերջին համայնքների ղեկավարներին տրվել էր համայնքների զարգացման ծրագրի կազմման նոր մեթոդաբանությունը: Բայց համայնքների բնակիչների հետ հանդիպումները փաստում են, որ համայնքների ղեկավարները դրանք շատ քիչ են քննարկել բնակիչների հետ: Արձանագրվել են դեպքեր, երբ համայնքի բնակիչներն առհասարակ տեղյակ չեն դրանց մասին կամ բարձրաձայնում են համայնքի համար կարևոր հիմնահարցեր, որոնք նույնիսկ տեղ չեն գտել այդ ծրագրի մեջ»,- կառավարության նիստում հայտարարեց վարչապետ Կարեն Կարապետյանը:
Վարչապետը կարևորեց համայնքների ղեկավարների ու մարզպետների կրթվելը. Գերմանիայի կառավարության հետ իրականացվող ծրագրի շրջանակներում 250 համայնքների ղեկավարների ուսուցման աշխատանքները պետք է արագացնել: Ամերիկյան համալսարանի հետ արդեն, կարծեմ, կնքել ենք պայմանագիր՝ բոլոր մարզպետները Ամերիկյան համալսարանում համապատասխան դասընթացներ են անցնելու ռեգիոնալ կառավարման վերաբերյալ:
Մարզպետները, պարզվում է՝ համաձայն են, որ իրենք համապատասխան գիտելիքի պակաս ունեն և այդ բացը լրացնելու ցանկացած հնարավորություն պետք է օգտագործել, և դա ողջունելի է: «Ես շատ հավանեցի այդ նախաձեռնությունը: Համոզված եմ, որ կոնկրետ դրա կարիքը ես ունեմ: Դա ընդհանուր գիտելիքներ է տալիս և հրաժարվել դրանից, կամ համարել, որ այս տարիքում կրթվելը, կրթվելու կոչը վիրավորական է՝ անմտություն է»,-«Առաջին լրատվական»-ի հետ զրույցում ասաց Վայոց ձորի մարզպետ Հարություն Սարգսյանը: Նրա խոսքերով՝ ինքը դեռ քաղաքապետ եղած ժամանակ անձամբ և իր աշխատակիցներին կոչ է արել մասնացել ցանկացած դասընթացի, թրեյնինգի, որից կարելի է մի նոր բան սովորել: «Ես համոզված եմ, որ ինչ որ բան կստանամ այս նոր դասընթացից և վարչապետի հորդորը շատ տեղին է»,-հավելեց մարզպետը:
Արմավիրի մարզպետ Աշոտ Ղահրամանյանը ևս կարծում է, որ ցանկացած մարդ, պաշտոնյա մշտապես պետք է սովորի: «Աշխարհում այնքան նոր կառավարչական մեթոդներ կան: Մարդը, եթե աշխատում է պետական հիմնարկում՝ մինչև կյանքի վերջը պետք է սովորի»,-ասաց Ղահրամանյանը՝ հավելելով, որ այդ լրացուցիչ գիտելիքներն էլ բավարար կլինեն, որ վերացվեն վարչապետի մատնանշած խնդիրները:
«Միանշանակ օգտակար և անհրաժեշտ էր»,- հակիրճ պատասխանեց Տավուշի մարզպետ Հովիկ Աբովյանը: