ԴԱՀԿ նախկին պետ կամ հանրությանն առավելապես Քեթրինի Միհրան մականունով հայտնի Միհրան Պողոսյանը համարվում է մեր երկրի ամենահարուստ մարդկանցից մեկը: Նաև հայտնի է, որ նա բարձր պաշտոնների, մեծ հարստության և մեծ հնարավորությունների տեր է դարձել իր քեռու՝ ԱԱԾ պետի նախկին տեղակալ Գրիշա Հարությունյանի հովանավորության արդյունքում: Վերջինս մտերիմ հարաբերություններ ունի Սերժ Սարգսյանի հետ:
Իհարկե, այդ հովանավորությունը կարող էր առ ոչինչ լինել, եթե Մ. Պողոսյանն ինքը շատ ճարպիկ չլիներ և հարստություն դիզելու համար ամենատարբեր, ամենաբարդ և ամենանուրբ մեթոդներին չդիմեր: Մասնագիտությամբ լինելով իրավաբան-տնտեսագետ՝ նա բիզնեսի վարման այնպիսի սխեմաներ է գծում, որ շատ դժվար է լինում հայտնաբերել, թե որ ընկերություններն են պատկանում նրան, որտեղ են դրանք գրանցված և ինչով են դրանք զբաղվում: Եվ այդ ունակությունների շնորհիվ նա օֆշորային գոտիներում շատ բարդ ու խճճված ընկերություններ է բացել ու դրանցով ահռելի գումարներ վաստակել: Այդ մասին հայտնի դարձավ անցած տարվա գարնանը, երբ գաղտնազերծվեցին Պանամայի օֆշորային փաստաթղթերը ու երբ պարզ դարձավ, որ նա ու Ադրբեջանի նախագահ Իլհամ Ալիևը նույն օֆշորներում միանման գործունեություն են ծավալում: Իսկ ինքը հրաժարական տվեց ոչ թե այն պատճառով, թե բարձրաստիճան պաշտոնյան ինչ գործ ունի բիզնեսի հետ, որ մի հատ էլ դրանք օֆշորային գոտիներում է տեղավորում, այլև ընդամենը այն բացատրությամբ, որ իր անունը շոշափվել է Ալիևի անվան հետ: «Ցավում եմ, որ անունս արծարծվում է միլիարդավոր դոլարներ իրականում սեփականացրած՝ Ադրբեջանի նախագահ Իլհամ Ալիևի ընտանիքի կողքին»,- բավականին նրբորեն ասել էր նա՝ տարածելով իր հրաժարականի տեքստը:
Եվ նա բիզնեսի իր բարդ մեթոդների շնորհիվ տարիներ առաջ էլ Հայաստանը դարձրել էր բանան արտահանող երկիր ու այդպես շարունակ: Բայց Մ.Պողոսյանն իրեն վերագրվող ոչ բոլոր բիզնեսները կամ հարստությունն է գրանցում իր անունով, ընդամենը դրանց չնչին մասն է հայտարարագրում: 2016թ. երբ նա հրաժարական էր տվել, այդ պահի դրությամբ հայտարարագրել է 1 հատ անհատական բնակելի տուն` հողամասի վրա կառուցված՝ իր տնտեսական շինություններով, 6 հատ հասարակական նշանակության շինություն, 1 հատ արտադրական նշանակության շինություն, 1 հատ ավտոտնակ, 26 միլիոն դրամ, 191 հազար դոլար, 12 հազար եվրո: Իհարկե, սա էլ բավականին պատկառելի կարողություն է աշխատավարձով ապրող պետական պաշտոնյայի համար, բայց շատ չնչին է իրեն վերագրվող կարողություններից:
Մ. Պողոսյանը նաև մեծ գումարների փոխառություններ է տալիս։ Իսկ 2013-2014 թթ. նա գումարի բռնագանձման պահանջով 4 հայցադիմում է ներկայացրել դատարաններ և պարտքը վերադարձրել դատական կարգով։ 2013 թ. ապրիլին 53 մլն դրամ գումարի բռնագանձման պահանջով հայցադիմում է ներկայացրել ընդդեմ «Սթար Դիվայդ» ՓԲԸ-ի։ Գործը դատաքննության նախապատրաստելու փուլում Մ. Պողոսյանը հրաժարվել է հայցապահանջից՝ պատճառաբանելով, թե «պատասխանող ընկերությունը հայցադիմումով պահանջվող գումարը կանխիկ եղանակով ամբողջությամբ վերադարձրել է»: Նույն օրը մեկ այլ հայցադիմում է ներկայացրել՝ 4․7 մլն դրամի պահանջ ներկայացնելով «Բյուրակն» ՍՊԸ-ի դեմ։ Այս գործը ևս կարճվել է, քանի հայցից՝ տեղեկացնելով, որ ընկերությունը պարտավորությունը կատարել է։ Մ. Պողոսյանը 2013 թ. նոյեմբերին քաղաքացի Գևորգ Աֆանդյանի դեմ է հայցադիմում ներկայացրել դատարան՝ պահանջելով 5 մլն 147 հազար դոլար:
Եվ հետաքրքիր է, որ Մ. Պողոսյանը իր հայտարարագրերում Պանամայի օֆշորային գոտիներում նշված ընկերությունների մասին որևէ նշում չի արել: Իսկ համաձայն գաղտնազերծված փաստաթղթերի՝ նա բաժնետեր է Պանամայում գրանցված երեք՝ «Սիգթեմ ռեալ իսթեյթ ինքորփորեյթիդ» (Sigtem Real Estates Incorporated), «Հոփքինթեն թրեյդինգ ինքորփորեյթինդ» (Hopkinten Trading Incorporated), «Բանջիո ինվեստ» ԲԸ (BANGIO INVEST S.A.) ընկերությունների: Մամուլի հրապարակումների համաձայն՝ «Սիգթեմ ռեալ իսթեյթ ինքորփորեյթիդ» և «Հոփքինթեն թրեյդինգ ինքորփորեյթինդ» ըկերությունները հավասարապես կիսում են Հայաստանում գրանցված «Բեսթ ռեալթի» ՍՊԸ-ի բաժնեմասը: Իսկ այս ընկերությունն իրականացրել է Կարեն Դեմիրճյանի անվան մարզահամերգային համալիրի գնահատումը ԴԱՀԿ-ի վարույթի շրջանակներում՝ այն գնահատելով ընդամենը 25․8 մլրդ դրամ՝ հաշվի չառնելով, որ դա պետական հուշարձան է:
Իսկ «Քեթրին գրուպ» ՍՊԸ-ն բանանի, ցիտրուսային և տրոպիկական մրգերի ներմուծումից զատ զբաղվում է նաև ագրոբիզնեսով՝ ներմուծում է պարարտանյութեր և թունաքիմիկատներ, բուծում և բազմացնում է խոզեր, կովեր, ոչխարներ և հնդկահավեր: Նույն հրապարակումների համաձայն՝ «Քեթրին գրուպը» առանց մրցույթների ձեռք է բերում պետական կառույցների հետ պետգնումների պայմանագրեր: Ավելին, Մ. Պողոսյանն անգամ իր ընկերության և ԴԱՀԿ-ի միջև գործարքներ արել՝ 2015թ. պետգնումների պայմանագրով 3 մլն դրամ արժեքով ավտոմեքենաների վերանորոգման ծառայությունների պայմանագիր է կնքել «Քեթրին գրուպի» հետ: Մ. Պողոսյանին է վերագրվում նաև Ծաղկաձորի «Կեչառիս» հյուրանոցային համալիրը: Բնականաբար, նա, այն իր ազգականներից մեկի՝ Էդուարդ Հարությունյանի անունով է գրանցել, ով վերը նշված «Բեսթ Ռեալթի» ՍՊԸ-ի տնօրենն է:
Եվ ահա այս մարդն այսօր առաջադրվել է որպես պատգամավորի թեկնածու: Այդպիսով նա ցանկանում է մաքրվել պանամական օֆշորի սև բծերից, և իշխանությունները տվել են նրան այդ հնարավորությունը: Արդեն իսկ հրապարակումներ կան, որ նա դրան հասնելու համար գումար չի խնայում, և կծախսի հավանաբար Հայաստանի ընտրությունների պատմության մեջ երբևէ չծախսված մեծ գումարներ: Մ․ Պողոսյանը դրան հասնելու համար կանգ չի առնում որևէ սրբության առաջ՝ անգամ զոհված ազատամարտիկների մայրերին է ծառայեցնում իր քարոզչության համար, այն դեպքում, երբ այդ տղաներն արդեն զոհվել են, որ Քեթրինի Միհրանը օֆշորներում հանգիստ բիզնես անի: