Նոր կառավարությունը աննընդհատ շեշտում է Սփյուռքի անհրաժեշտության և դերակատարության մասին, սփյուռքահայությանը հրավիրում են, կանչում են՝ մասնակից դառնալու սոցիալական, տնտեսական, մշակութային զարգացմանը: «Առաջին լրատվական»-ի հետ զրույցում անդրադառնալով այս դիտարկմանը և հարցին՝ սփյուռքահայերը ականջալուր կլինե՞ն, կընդունե՞ն իշխանության առաջարկները, կանադահայ դերասանուհի Արսինե Խանջյանը նշեց. «Բայց այդ կոչի բուն իմաստը նախ պետք է տեսնենք:
Այդ կոչը նախ՝ շատ նեղ ծիրերի մեջ է, որ տեղի ունեցավ՝ վերջին 25 տարիների ընթացքում: Այդ կոչը մեզ իրավունք է տալիս միայն որոշ ձեռնարկումների մասնակցելու, և այդ կոչը միայն որոշ կազմակերպությունների, Սփյուռքի որոշ կուսակցությունների կամ բարեգործական հաստատությունների կողմից կարող է ընդունվել կամ եկեղեցու կողմից: Սփյուռքի հաստատությունները և Հայաստանի իշխանությունները միշտ էլ բավարար հարաբերություններ են ունեցել և կարողացել են օժանդակել Հայաստանին, մասնակից են եղել:
Բայց այսօրվա կառավարության կոչը, կարծում եմ, որ տարբեր տեսանկյուններով տեղի ունեցավ և տեղի ունեցավ հուլիսյան հարցերից հետո:
Սփյուռքը միայն հաստատությունների միջոցով չէ, որ կարող է մասնակից լինել հայաստանյան կյանքին, այլ նաև քաղաքացիական մշակույթի՝ անհատների: Եվ մենք հանդես եկանք նախաձեռնությամբ՝ 5000 հոգի ստորագրեցին «Արդարություն Հայաստանում» նախաձեռնության տակ, որում շատ կետերի էինք անդրադարձել՝ մարդու իրավունքներ, քաղաքացիական իրավունք, արտագաղթ, ոստիկանների վայրենի կեցվածք ժողովրդի նկատմամբ և այլն: Այդ ժամանակ մենք բացարձակապես չէինք խոսել տնտեսական հարցի շուրջ, թեև հսկայական աղքատության կա Հայաստանում:
Նոր վարչապետը չփափագեց անգամ ակնարկել այն ամենի մասին, որ մենք պահանջում էինք, այլ որոշեց, որ տնտեսական միջոցառումներին կարող է Սփյուռքը մասնակից լինել, ևս մեկ անգամ խախտեց և սխալվեց այդ հարաբերության հարցում, որ պետք է հաստատվի Սփյուռքի հետ:
Մենք այսօր ունենք շատ առաջադեմ անհատներ, որ իսկապես հետաքրքրված են Հայաստանով, բայց հետաքրքրված չեն այստեղի իշխանության և Սփյուռքի հաստատությունների միջև եղած հարաբերություններով: Նրանք ուզում են, օրինակ, գալ իբրև դիտորդ, որ ծանոթանալ Հայաստանի քաղաքացիների հետ, այդպիսի անհատներ շատ կան, որ կարող են տարբեր գործունեություն ծավալել Հայաստանում՝ իրենց փորձառությամբ ու իրենց պրոֆեսիոնալ կարողություններով, առանց պարտադրված զգալու, որ ծառայեն Սփյուռքի որևէ կուսակցության կամ եկեղեցու»:
Հարցազրույցն ամբողջությամբ՝ տեսանյութում: