Եվրոպայի խորհրդի՝ կոռուպցիայի դեմ երկրների խորհուրդը (GRECO) արդեն մի քանի տարի է՝ Ադրբեջանին առաջարկում է բացահայտել երկրի պաշտոնատար անձանց եկամուտների և ունեցվածքի մասին հայտարարագրերը, սակայն առաջարկը չի կատարվում՝ հայտնում է ադրբեջանական azadliq.info լրատվական գործակալությունը:
Այն հանգամանքը, որ Ադրբեջանը չի հրապարակում այդ հայտարարագրերը, ինչպես նաև կամք չի դրսևորում արդյունավետ համակարգ ստեղծելու ուղղությամբ, կասկածի առիթ է տալիս:
GRECO-ի կողմից 2017-ի մարտի 17-ին հրապարակված վերջին գնահատման հաշվետվության մեջ նշվում է, որ Ադրբեջանում պաշտոնյաներին և պատգամավորներին պատկանող բազմաթիվ ընկերություններ ոչ միայն չեն հայտարարագրվում, այլ նաև լրջորեն թաքցվում են:
«Ազատություն» ռադիոկայանի ադրբեջանական մասնաճյուղի կատարած հետազոտություններից պարզ է դառնում, որ մեծ հոգատարությամբ թաքցված ընկերությունները երկրի նախագահի ընտանիքին և բարձրաստիճան պաշտոնյաներին պատկանող ընկերություններն են:
Այդ ընկերությունների մեջ ամենամեծ թիվը կազմում են ալիևյան ընտանիքին և Ադրբեջանի արտակարգ իրավիճակների նախարարին պատկանող ընկերությունները:
Ադրբեջանում կան ընկերություններ, որոնք փաստացի կան գործում են, սակայն հարկային ծառայության բազայում դրանց մասին տեղեկություն առհասարակ չկա, դրանց մեծ մասի բաժնետերեր են Իլհամ Ալիևի աղջիկները` Լեյլա և Արզու Ալիևաները:
Ալիևյան ընտանիքին, բացի վերոնշյալ ընկերություններից, պատկանում են նաև մեծ թվով այլ բիզնեսներ և անշարժ գույք:
Paşa Holdinq-ի և նրա կազմի մեջ մտնող ընկերությունների վերաբերյալ տեղեկությունները գաղտնի են նաև Ադրբեջանի հարկերի նախարարության բազայում և նախարարությունը ընկերությունների վերաբերյալ լրագրողական հարցումները թողել է անպատասխան:
Այդուհանդերձ լրագրողական հետազոտությունները ցույց են տալիս, որ Ադրբեջանի ղեկավարությունը, ժողովրդի կողմից իրենց տրված իշխանությունը չարաշահելով, ժողովրդի միջոցները մսխում է իրենց շահերի համար, օրենքները խախտելով թաքցնում է անօրինական ճանապարհով ձեռք բերված հարստությունները, այդպիսով ցանկանալով խուսափել հասարակության ընդվզումից և խայտառակությունից:
