Նախօրեին Երուսաղեմի Սուրբ Հարության տաճարում տեղի է ունեցել Հիսուս Քրիստոսի Սուրբ Գերեզմանի վերանորոգմանը նվիրված հանդիսավոր արարողություն, որին մասնակցել է արտաքին գործերի նախարար Էդվարդ Նալբանդյանը: Արարողությանը ներկա էին Հունաստանի վարչապետ Ալեքսիս Ցիպրասը, այլ երկրների բարձրաստիճան ներկայացուցիչներ, քրիստոնեական եկեղեցիների առաջնորդներ, բազմաթիվ հավատացյալներ։
Պատրիարքության դիվանապետ Կորյուն վարդապետ Բաղդասարյանն «Առաջին լրատվական»-ի հետ զրույցում նշեց, որ պաշտոնական հանդիպումներ Էդվարդ Նալբանդյանը չի ունեցել, եկել է մասնակցելու արարողությանը և անմիջապես վերադարձել է: Կորյուն վարդապետը նշեց, որ արտաքին գործերի նախարարին հրավիրել էր պատրիարքը՝ մասնակցելու գերեզմանի վերաբացման արարողությանը: Նա նաև նշեց, որ վերանորոգման աշխատանքները կենտրոնացած էին գերեզմանի վրա, քանի որ այն վտանգված էր:
«Հրատապ անհրաժեշտություն կար սուրբ գերեզմանը վերանորոգելու, և մեկ տարի առաջ՝ մարտի 22-ին, համաձայնագիր ստորագրվեց երեք իրավատեր սեփականատերերի համայնքների հոգևոր առաջնորդների կողմից՝ վերանորոգման աշխատանքները սկսելու, և ճիշտ մեկ տարի հետո վերանորոգման աշխատանքներն ավարտվեցին, և տեղի ունեցավ բացումը: Մեզ համար սա շատ կարևոր է, քանի որ Երուսաղեմի հայոց պատրիարքությունը իր հիմնադրման օրվանից՝ 4-րդ դարից մինչև այսօր իր առաքելության ամենակարևոր մասը հենց համարում է սուրբ երկրի մեջ, սրբավայրերում մեր հայ եկեղեցու իրավունքների պաշտպանությունը, այդ սրբավայրերում արարողություններ կատարելը և ուխտագնացություն կազմակերպելը: Այս առումով գերեզմանի նորոգությունը և ապահով վիճակի բերելը, անշուշտ, կարևորվում են և մեր առաքելության մասն են կազմում, և կարող ենք մեր առաքելությունը ավելի ապահով կերպով շարունակել»,- ասաց նա:
Անդրադառնալով հայ և հույն համայնքների միջև տարաձայնություններին՝ Կորյուն վարդապետը նշեց, որ տարաձայնությունների հիմնական մասը լուծվել է, կոնկրետ գերեզմանի վերանորոգման առումով որևէ տարաձայնություն չի եղել. «Համաձայնագիրը ստորագրվել է երեք համայնքների մտահոգությունները հաշվի առնելով: Այս պահին էլ շարունակվում են բանակցությունները, և հույս ուենք, որ բոլոր խնդիրները իրենց տրամաբանական լուծումը կստանան: Սուրբ Հարության տաճարի հետ կապված՝ կան մեկ-երկու չլուծված հարցեր, բանակցությունները շարունակվում են, այնպես որ՝ հուսանք, որ բոլոր խնդիրները կլուծվեն»:
