Թուրքիայի արտգործնախարարությունը իր լուրջ անհանգստությունն է արտահայտել Անկարայում Ռուսաստանի գործերի ժամանակավոր հավատարմատար Սերգեյ Պանովին, հայտնում է Anadolu գործակալությունը՝ հղում անելով դիվանագիտական աղբյուրներին:
Դրա պատճառը դարձել են ռուս զինծառայողների լուսանկարները YPG-ի (սիրիական քրդերի ինքնապաշտպանության ուժեր) և YPJ-ի (կանանց ինքնապաշտպանական ջոկատներ) զինանշաններով: Լուսանկարներները կատարված են Նավրուզի հետ կապված միջոցառումների ժամանակ:
«YPG-ի զինանշան է բռնել նաև ռուս գեներալներից մեկը: Թուրքիայի արտգործնախարարությունում Պանովին հայտնել են, որ Մոսկվայում հիանալիորեն գիտեն Անկարայի դիրքորոշումը PYD-ի վերաբերյալ, ինչով և բացատրվում է թուրքական իշխանությունների անհանգստությունը լուսանկարների կապակցությամբ»,- հայտնել է գործակալությունը:
Ռուսական ԱԳՆ-ում հայտարարել են, որ Պանովի հետ թուրք գործընկերների զրույցը վերաբերվել է Սիրիայի ընթացիկ իրավիճակին: