ՀՀ սփյուռքի նախարարությունը ներկայացրեց մի շարք կառույցների հետ համագործակցության արդյունքում հրատարակված գրքերը: Միաժամանակ, Սփյուռքում հայապահպանությանն օժանդակելու և մշակութային համատեղ ծրագրեր իրականացնելու, ինչպես նաև համատեղ առողջապահական խնդիրների իրագործելու համար ՀՀ սփյուռքի նախարար Հրանուշ Հակոբյանը Մշակույթի նախարար Արմեն Ամիրյանի և Առողջապահության նախարար Լևոն Ալթունյանի հետ համատեղ հ րամաններ ստորագրեց:
Հրանուշ Հակոբյանը կարևորեց նախարարությունների հետ համագործակցությունը Սփյուռքի ներուժն օգտագործելու հարցում:
«Ինչպես հիշում եք, հանրապետության վարչապետը հանձնարարություն էր տվել, որպեսզի Սփյուռքի ներուժը օգտագործելու նպատակով կարողանանք համագործակցել և գտնել հնարավորություններ ու եզրերը, որոնց համաձայն կարելի է տարբեր նախարարությունների հետ անցկացնել միջոցառումներ: Այդ իսկ պատճառով երեք նախարարներով, նաև Կրթության և գիտության նախարարի հետ միասին որոշում կայացվեց համատեղ հրամաններ ստորագրել, որպեսզի ստեղծվեն համապատասխան աշխատանքի խմբեր, որոնք կհետևեն Հայաստանում և Սփյուռքում իրականացվելիք միջոցառումների կատարմանը: Հայապահպանության գլխավոր զենքը հատկապես Սփյուռքում հայ մշակույթն է, որը պետք ոչ միայն պահպանենք ու զարգացնենք, այլև հայ երիտասարդությանը լցնենք մշակույթով, որպեսզի նրանք հայ մնան»,- Հրանուշ Հակոբյանը:
Մշակույթի նախարարի խոսքով՝ շատ շուտով արդեն իսկ կներկայացվեն համատեղ ծրագրերի արդյունքները:
«Մենք պարզապես իրավունք չունենք չօգտագործելու Սփյուռքի ներուժը և օգտագործելու տարբեր առումներով: Անչափ կարևոր եմ համարում այս համատեղ հրամանը, քանի որ այն արդեն իսկ նշանակում է կոնկրետ գործողությունների ծրագիր, պատասխանատուներ և ժամկետներ: Մոտ ապագայում՝ մի քանի ամիս հետո, մենք կարձանագրենք մեր սկսած գործողությունների արդյունքներն ու հաջողությունները. ինչու հաջողություններ, որովհետև արդեն իսկ ունենք շատ հստակ պայմանավորվածություններ Սփյուռքի մշակույթի գործիչների հետ»,-ընդգծեց Արմեն Ամիրյանը:
Լևոն Ալթունյանը նույնպես կարևորեց համատեղ ստորագրված հրամանը՝ նշելով, որ այն նպաստելու է բժշկության ոլորտի հետագա զարգացմանը:
«Բոլորս գիտենք, և գաղտնիք չէ, որ անկախության բոլոր տարիներին օգտագործել ենք սփյուռքահայ բժիշկների ներուժը առողջապահության բոլոր ինստիտուտներում տարբեր ուղղություններով: Ժամանակն է ոչ միայն անդրադառնալ հայ հանճարների ներուժին և նրանց ներդրմանը հայ անկախության, հայ բժշկության մեջ, բայց նաև ստեղծել աշխատատեղեր շարքային բժիշկների, բուժակների համար: Այս առումով համագործակցությունը սկիզբ կդնի շարունակական և համակարգված աշխատանքի»,-եզրափակեց Առողջապահության նախարարը:
Ներկայացված աշխատությունները մշակվել էին ՀՀ ԳԱԱ պատմության ինստիտուտի, լեզվի ինստիտուտի, Մ. Աբեղյանի անվան գրականության ինստիտուտի, ԵՊՀ արևելագիտության ֆակուլտետի և այլ կառույցների պրոֆեսորների և ակադեմիկոսների կողմից: Ցանկը ներառում էր «Գրական արևմտահայերենի ուսումնասիրության պատմություն», «Գրաբարի ներկայացում համընդհանուր ցանցային լեզվի բառարանային համակարգում», «Լեռնային Ղարաբաղի հիմնահարցը Թուրքիայի հասարական-քաղաքական դիսկուրսում» և այլ աշխատություններ: