Նախընտրական մրցավազքի շրջանակներում ՀՀԿ քարոզչությունն իրականացնող Կարեն Կարապետյանը Արարատի մարզ այցելությանը վաղուց էր պատրաստվում և, ինչպես նշում էին ԶԼՄ-ները, բավականին հիմնավոր: Ի վերջո, այս մարզը նախկին վարչապետ, ՀՀԿ փոխնախագահ Հովիկ Աբրահամյանի կալվածքն է, և գործող վարչապետը պատրաստվում էր նրան իր իսկ կալվածքում ցույց տալ, որ նա այլևս նախկին է՝ բոլոր առումներով: Տրամաբանական է, որ Հովիկ Աբրահամյանն էլ իր հերթին պետք է պատրաստվեր ինչ-որ բաներ հասկացնել «պղտոր առվակին»: Բայց երեկվա անցուդարձից պարզ դարձավ, որ թե՛ նախկին և թե՛ ներկա վարչապետներն ընդամենը դերակատարներ են և առավելագույնը, որ հանրապետության մակարդակով ընթացող հիմնական զարգացումներում կարող են անել, այդ զարգացումներին ֆիզիկապես մասնակցելն է, ոչ ավելին:
Արտաշատում գործող վարչապետին ընդունեցին, մեղմ ասած, վատ: Բայց պարզ տրամաբանությամբ այդ ընդունելության, առավել ևս՝ վատի հետ նախկին վարչապետը էական կապ չուներ: Ընդունված կարգի համաձայն՝ նման մակարդակի հանդիպումներում մարզպետի հանձնարարությամբ յուրաքանչյուր գյուղապետ ըստ անհրաժեշտության ապահովում է 5-10 «խելքը գլխին» մասնակցի ներկայություն՝ հավելած դպրոցների, մանկապարտեզների, հիվանդանոցների և մյուս պետական ձեռնարկությունների, մարզի գործարարների, աշխատակազմերի, մարզպետարանի փոքրիշատե հասկացող աշխատակիցների մասնակցությունը, որ ամենամեղմ հաշվարկներով՝ պետք է կազմեր մի քանի հազար:
Արտաշատում Կարեն Կարապետյանի հետ հանդիպմանը մարզպետարանին կից հրապարակում հազիվ հազար մարդ լիներ: Տրամաբանորեն մասնակիցները պետք է ներկայացնեին հիմնականում «մարզի էլիտան», մտավորական հատվածը: Միայն 600-700 հոգի գյուղապետերը, տեղակալները, դպրոցների տնօրեններն ու մարզպետարանի աշխատակիցներն են: Սակայն միջոցառման առաջին իսկ վայրկյաններից հասկացվեց, որ վարչապետն ու ժողովուրդը չեն լսում միմյանց: Այնքան, որ խոսքն սկսելուց անմիջապես հետո վարչապետը «ստիպված եղավ հանդիսատեսից թույլտվություն խնդրել» խոսքը շարունակելու համար:
Այդուհանդերձ, մինչև վերջ էլ լսարանն ու վարչապետը անհաղորդ մնացին միմյանց: Այնպես չէր, որ մի քանիսը միտումնավոր փորձում էին խանգարել, անհաճո հարցեր տալ (չնայած նման հարցեր էլ հնչեցին), ինչ-որ բան ցույց տալ, ապացուցել: Ամենևին: Տպավորություն էր, որ հանդիպումն այնպես չի կազմակերպվել, իսկ ավելի ճիշտ՝ կազմակերպվել է բոլորովին այլ սցենարով: Այնպես, որ վարչապետը խիստ, չթաքցրած նեղացածությամբ շտապ հեռացավ Արտաշատից՝ իր ելույթից հետո «ի սրտե» խոսք ու զրույցի չբռնվելով իր ժողովրդի հետ, ինչը վերջին օրերին բավականին ցուցադրական անում է:
Բնականաբար, նա նման նեղացած վերաբերմունք չէր կարող դրսևորել Հովիկ Աբրահամյանի նկատմամբ, որն իրականում նրա հակառակորդն է: Հետևաբար նեղացածության հասցեն պետք է այլ ուղղությամբ փնտրել: Մարզպետը երբեք չէր համարձակվի նման ինքնագործունեության գնալ: Հետևաբար հրահանգն իջեցվել էր ավելի բարձր մակարդակից: Ինչո՞ւ, ո՞րն էր նպատակը: Իսկ նպատակը շատ պարզ է: Այսկերպ նախագահ Սերժ Սարգսյանը վարչապետին հստակ հասկացնել տվեց, որ չափից ավելի է ոգևորվել: Արտաշատից ընդամենը մեկ ժամ առաջ Մասիսում, դրանից առաջ էլ հանրապետության այլ վայրերում կայացած հանդիպումների ընթացքում արդեն բարձրաձայնվում էր, որ ժողովուրդը որպես ՀՀԿ առաջնորդ տեսնում է Կարեն Կարապետյանին, Հայաստանի Հանրապետության վաղվա օրը տեսնում է միայն նրա հետ:
Սերժ Սարգսյանը վարչապետին Արտաշատում «սառը ցնցուղի» տվեց, որ վերջինս թյուրիմացության մեջ չհայտնվի՝ լուրջ ընդունելով այդ ամենը: ՀՀԿ և ՀՀ առաջնորդն առայժմ ու առաջիկայում մեկն է` Սերժ Սարգսյանը: Արտաշատով նա Կարեն Կարապետյանին հասկացնել տվեց, որ ցանկացած պահի, ցանկացած վայրում նա կարող է արժանանալ նման ընդունելության, ու եթե այլ վայրերում այլ ընդունելության է արժանանում՝ դա իր շնորհքը չէ:
Արտաշատյան դեպքերը երկսայր էին: Այստեղ նա մեսիջներ հղեց նաև մարզի կալվածատեր Հովիկ Աբրահամյանին՝ վերջինիս հասկացնել տալով, որ իր իսկ տարածքում զարգացումներ են ընթանում (գուցե նույնիսկ միայն առաջին հայացքից Աբրահամյանի օգտին), որին ինքը և՛ տեղյակ չէ, և՛ մասնակից չէ, և՛ դրանց վրա որևէ կերպ ազդել չի կարող: Դրանով իսկ նա երկու վարչապետներին ցույց տվեց, որ վերջիններիս շարժերի թելերը իր ձեռքում են:
Ընդամենը երկու օր առաջ էլ ճիշտ նման զարգացումներ տեղի ունեցան Սյունիքի մարզում, երբ ժողովուրդը շատ վատ ընդունեց ազգի փրկիչ Գագիկ Ծառուկյանին: Այնքան, որ վերջինս դժգոհեց, թե մարզպետը վատ հարցեր է սովորեցրել, որ տան իրեն: Մարզպետն այստեղ կապ չունի: Տիգրան Մուկուչյանի կողմից Ծառուկյանին արած զգուշացումից հետո Սերժ Սարգսյանը ստիպված էր իր հերթական վարչապետացուին Սյունիքում «կազմակերպված ընդունելությամբ» հասկացնել, որ չափերն անցել է, և այսուհետ իր համար նախատեսված շրջանակներում «չտեղավորվելու» դեպքում «ամենուր կարժանանա Սյունիքի»: Որից հետո, ինչպես ասում են, ամեն ինչ իր տեղն ընկավ:
Այնպես որ, Արտաշատի դեպքերը անսպասելի չէին, դրանք շարունակությունն էին Սյունիքի զարգացումների: Դրսում հարցերը լուծելուց հետո Սերժ Սարգսյանը կենտրոնանում է ներքին զարգացումների վրա և անմիջապես կարմիր քարտ ցույց տալիս իր թե՛ նախկին, թե՛ գործող և թե՛ թեկուզ մի քանի ամսով գործելու ցանկություն դրսևորող վարչապետներին ու վարչապետացուին: Եվ դա անում է հանուն ապահով Հայաստանի: