ԱՄՆ նախագահ Դոնալդ Թրամփի համար այժմ հեշտ չէ. Հետախուզության դաշնային բյուրոն հետաքննում է Թրամփի նախընտրական շտաբի հավանական կապերը Ռուսաստանի հետ՝ գրում է Focus-ում Յուլյան Ռոռերը:
Ո՛չ Հետախուզության դաշնային բյուրոյի ղեկավար Ջեյմս Կոմին, ո՛չ Ազգային անվտանգության գործակալության տնօրեն Մայք Ռոջերսը, որոնք ելույթ են ունեցել երկուշաբթի Կոնգրեսի լսումներին, չեն մեկնաբանել պայմանավորվածությունների վերաբերյալ ապացույցների գոյության փաստը և չեն հայտնել Թրամփի շտաբի աշխատակիցների անունները, որոնք կասկածվում են ՌԴ-ի հետ կապեր ունենալու համար: Սակայն Միացյալ Նահանգների հարցերով փորձագետ Թոմաս Եգերի համար ակնհայտ է, որ եթե մեղադրանքները ամրագրվեն ապացույցներով, անհավանական չափերի սկանդալ կծագի: Փորձագետը երեք հավանական սցենար է առաջ քաշել առաջիկա ամիսների համար:
Առաջին սցենար. «Եթե ապացույցներ չլինեն, Թրամփը կարող է օգտվել իրավիճակից՝ օգտագործելով այն հօգուտ իր շահերի: Դա նույնիսկ կարող է ամրապնդել Թրամփի դիրքերը»,-կարծում է փորձագետը:
Երկրորդ սցենար. ապացույցներ կլինեն, սակայն կասկածները կշարունակվեն: «Եթե հետաքննությունում սպիտակ կետեր մնան, Ներկայացուցիչների պալատը պաշտոնական մեղադրանքներ չի առաջադրի Թրամփի դեմ: Այս ամենը կվնասի Թրամփի, Հանրապետական կուսկցության հեղինակությանը, սակայն իմփիչմենթի գործընաց չի լինի»,-կարծում է Եգերը:
Երրորդ սցենարը նախատեսում է անհերքելի ապացույցների առկայություն, որոնք կասկածի առիթ չեն թողնի: «Եթե ապացուցվի այն փաստը, որ Թրամփն իմացել է Ռուսաստանի հետ կապերի մասին, Ներկայացուցիչների պալատը այլ ելք չի ունենա, բացի նախագահի դեմ հայց ներկայացնելուց»,-վստահ է փորձագետը: Այս դեպքում Սենատը իմփիչմենթի գործընթացը սկսելու որոշում կկայացնի: Սենատում հանրապետականները մեծամասնություն են կազմում և տեսականորեն որոշում կարող է կայացվել հօգուտ Թրամփի: «Բայց Սենատում Թրամփն ունի նաև թշնամիներ, որոնք կցանկանային հեռացնել նրան: Եվ այս պարագայում նախագահ կդառնա ներկայիս փոխնախագահ Մայք Փենսը»,-ասել է Եգերը:
Փորձագետի կարծիքով՝ գերմանական հատուկ ծառայությունները վարում են սեփական հետաքննությունը, քանի որ դաշնային կառավարությունը ցանկանում է իմանալ՝ որքան կայուն են Թրամփի դիրքերը:
.