Ռուսաստանում Հայաստանի դեսպանությունը ակտիվ համագործակցելու է զանգվածային լրատվամիջոցների հետ: Մարտի 22-ին լրագրողների հետ հանդիպման ժամանակ ասաց ՌԴ-ում Հայաստանի արտակարգ և լիազոր դեսպան Վարդան Տողանյանը:
«Այս տարի կա համատեղ կազմակերպված շատ հետաքրքիր միջոցառումների ցանկ: Մենք կլինենք բավականին ակտիվ, բաց և թափանցիկ լրատվամիջոցների հետ: Համացանցում դեսպանատունն ունի իր ֆեյսբուքյան և թվիթերյան էջերը, և համացանցի առումով նույնպես ակտիվ աշխատանք է տարվելու»,- նշեց Տողանյանը: Դեսպանը տեղեկացրեց, որ 2017 թվականի նոյեմբերին մարշալ Հովհաննես Բաղրամյանի 120-ամյակի կապակցությամբ «Իզվեստիա» թերթի հետ համատեղ Երևանում կազմակերպվելու է զորահրամանատարի կյանքին ու գործին նվիրված լուսանկարների ցուցահանդես:
Տողանյանի խոսքով` դեսպանատունը ակտիվ համագործակցելու է նաև դիվանագիտական բուհերում սովորող ուսանողների հետ:
«Մեր ցանկությունն է ավելի ընդլայնել Հայաստանի մասին պատկերացումները՝ ներկայացնելով մեր երկրի ավանդույթները, մշակույթը և այլն: Դա արվելու է ոչ միայն Մոսկվայում, Դոնի Ռոստովում, Սանկտ Պետերբուրգում, այլև Հեռավոր Արևելքում»,- ընդգծեց դեսպանը:
Մարտի 10-ին ՀՀ նախագահ Սերժ Սարգսյանի հրամանագրով ՌԴ-ում ՀՀ արտակարգ և լիազոր դեսպան է նշանակվել Վարդան Տողանյանը:
Մարտի 16-ին Վարդան Տողանյանն իր հավատարմագրերը հանձնեց ՌԴ նախագահ Վլադիմիր Պուտինին։
