Մերձբալթյան երկրներում հայտնի Тravelblog.lv բլոգը մեծ հոդված է հրապարակել Արցախի վերաբերյալ՝ ընթերցողների ուշադրությունը հրավիրելով հանրապետության զբոսաշրջային գրավչության վրա: Հոդվածը կրում է «Հանգիստ գոյություն չունեցող երկրում. Լեռնային Ղարաբաղի Հանրապետություն» խորագիրը:
«Կովկասյան Շվեյցարիա, նման անվանում է ստացել չճանաչված Լեռնային Ղարաբաղի Հանրապետությունը»,-գրում է հոդվածագիրը՝ հավելելով, որ Արցախի լեռների 40 տոկոսն անտառապատ է:
Չնայած քաղաքական և տնտեսական շրջափակմանը՝ երկրի կառավարությունը ակտիվ զարգացնում է զբոսաշրջությունն Արցախում՝ գրում է հեղինակը և փաստում, որ վերջին 10 տարիներին Արցախի հանդեպ հետաքրքրությունը մեծացել է, զբոսշրջիկների թիվն ավելցել է ավելի քան 4 անգամ՝ հասնելով 16 հազարի:
Բլոգերը նաև ընդգծում է, որ Արցախի վերականգնման հարցում մեծ է արտասահմանում բնակվող հայերի ներդրումը, որոնց ջանքերով էլ կառուցվել են ճանապարհներ, դպրոցներ, հիվանդանոցներ, բնակելի թաղամասեր: Կայքը նշում է, որ Արցախ հնարավոր է մուտք գործել միայն Հայաստանի կողմից՝ ցամաքային ճանապարհով:
Հեղինակը նաև գրում է, որ Արցախի զբոսաշրջային գրավչությունը հաստատել են համաշխարհային պարբերականները, որոնց թվում են՝ The New York Times-ը, The Guardian-ը:
