Թուրքիայի արտաքին գործերի նախարար Մևլութ Չավուշօղլուն Վաշինգտոնում հանդիպում է ունեցել Միացյալ Նահանգների արդարադատության նախարար Ջեֆ Սեշոնսի հետ, հաղորդում է թուրքական «Անադոլու» գործակալությունը:
Հանդիպման ընթացքում քննարկման գլխավոր հարցերից մեկը եղել է չափավոր իսլամի քարոզիչ Ֆեթուլլահ Գյուլենին կալանավորելու և Թուրքիա վերադարձնելու հարցը: Արտգործնախարար Չավուշօղլուն ԱՄՆ արդարադատության նախարարին է ներկայացրել Թուրքիայում հուլիսի 15-ի ռազմական հեղաշրջման փորձի կազմակերպման գործում Գյուլենի մեղսակցությունը փաստող նոր ապացույցներ:
Թուրքիայի իշխանությունները Ֆեթուլլահ Գյուլենին մեղադրում են երկրում հուլիսի 15-ի ռազմական հեղաշրջման փորձը կազմակերպելու մեջ: Այս կապակցությամբ, երկրի պետական և մասնավոր ոլորտները սկսել են մաքրել գյուլենականներից: Գյուլենը, սակայն, ի սկզբանե հերքել է մասնակցությունը կատարվածին: Նա կատարվածի կազմակերպիչ է հայտարարել Թուրքիայի նախագահ Ռեջեփ Թայիփ Էրդողանին, ով այդպիսով փորձել է ամրապնդել իշխանությունը: