Աջ «Հանրապետականներից» Ֆրանսիայի նախագահի թեկնածու Ֆրանսուա Ֆիյոնը 2015 թվականին միջնորդ է հանդիսացել ՌԴ նախագահ Վլադիմիր Պուտինի, ինչպես նաև ֆրանսիական Total-ի տնօրենների խորհրդի նախագահ Պատրիկ Պույանեի հետ լիբանանցի միլիարդատեր Ֆուադ Մահզումիի հանդիպումների կազմակերպման գործում, ինչի համար ստացել է 50 հազար դոլար։ Այս մասին հայտնում է Le Canard enchaîné պարբերականը։
Ֆիյոնի 2F Conseil խորհրդատվական ընկերությունը 2015-ի սկզբին պայմանագիր էր ստորագրել խողովակներ արտադրող Future Pipe Industries ընկերության հետ, որը պատկանում է Ֆուադ Մահզումիին։ Ֆիյոնի հետ լիբանանցի միլիարդատիրոջ կապերի մասին օրեր առաջ հայտնել էր Mediapart պարբերականը։
Պայմանագիրը նախատեսել է, որ Ֆիոյնը պետք է Մահզումիին ներկայացներ Ռուսաստանի, Ֆրանսիայի, Գաբոնի, Ալժիրի և Կոտ դ՝Իվուարի ղեկավարությանը, ինչպես նաև ֆրանսիական բիզնեսի ներկայացուցիչներին։
2015 թվականի հունիսին Ֆիյոնը հանդիպումներ է կազմակերպել ՌԴ նախագահ Վլադիմիր Պուտինի և Total-ի ղեկավար Պատրիկ Պույանեի հետ։
Բացի 50 հազար դոլարից, նախատեսվում էր տոկոսներ յուրաքանչյուր կնքված գործարքից։ Սակայն Future Pipe Industries-ում հայտնել են, որ Ֆիյոնը ոչ մի հավելյալ գումար չի ստացել։
Երկու հանդիպումներն էլ կայացել են Պետերբուրգի միջազգային տնտեսական ֆորումի ժամանակ։
Ավելի վաղ Ֆիյոնը հայտարարել էր, որ իր խորհրդատվական ընկերության հաճախորդների շարքում չեն եղել ո՛չ ռուսական ձեռնարկություններ, ո՛չ էլ ռուսական կառավարության ներկայացուցիչներ։ Իսկ դասախոսությունների համար, որոնք նա կարդացել է Ռուսաստանում, գումար չի ստացել։ Le Canard enchaîné-ը նշում է, որ այդ հայտարարությունը հանդիսանում է մասամբ ճիշտ։