Հյուսիսային Կորեան հրթիռային արձակում է իրականացրել արևելյան ափից՝ Վոնսան քաղաքի շրջանում։ Այս մասին հայտնում է ճապոնական «Կիոդո» գործակալությունը՝ հղում անելով կառավարական աղբյուրներին։
Հրթիռի տեսակն անհայտ է։ Ենթադրաբար, արձակումն անհաջող է եղել։
Մարտի սկզբին Հյուսիսային Կորեան 4 հրթիռ էր արձակել, որից մեկը ընկել էր ճապոնական Ակիտա պրեֆեկտուրայից ընդամենը 200 կմ հեռու, մնացած 3-ը՝ այդ պրեֆեկտուրայից 300-500 կմ հեռու։ Հրթիռներն ընկել էին ժամանակային հավասար միջակայքերով, ինչը խոսում է միաժամանակ մի քանի օբյեկտների հարվածելու պոտենցիալ հնարավորության մասին։ Ճապոնիայի վարչապետ Սինձո Աբեն այդ արձակումներն անվանել էր «սպառնալիքի նոր մակարդակ» Ճապոնիայի համար։
