Սերժ Սարգսյանը պատրաստվում է մեկնել Արաբական Միացյալ Էմիրություններ, որտեղ անցկացվելու է Հայաստանին նվիրված ներդրումային համաժողով: Նման համաժողովի պայմանավորվածություն ձեռք է բերվել նախորդ տարեվերջին Սարգսյանի ԱՄԷ կատարած պաշտոնական այցի ընթացքում: Սերժ Սարգսյանը փորձելու է արաբական ներդրումներ ներգրավել Հայաստանի տնտեսություն:
Ներդրումների օդի և ջրի նման անհրաժեշտությունը կասկած չի հարուցում, կասկած է հարուցում այն, որ Սերժ Սարգսյանն է այն գործիչը, որը կարող է Հայաստանի համար ապահովել ներդրումային գրավչություն: Դրա պարզ վկայությունը նրա նախագահության տասնամյակի ընթացքում Հայաստանի ներդրումային անապատն է: Տասնամյակի ընթացքում Հայաստանին եթե հաջողվել է արտաքին ֆինանսական մեծ միջոցներ ներգրավել, ապա միայն արտաքին հսկայական պարտքի միջոցով, որը տասը տարվա ընթացքում հասցվել է ՀՆԱ-ի կեսից ավելիին: Հայաստանը ըստ էության տասը տարի ապրում է պարտքով:
Ներդրումների փոխարեն Սերժ Սարգսյանը պարտքեր է ներգրավել, և չնայած դա արել են, այսպես ասած, դե յուրե կառավարությունները, սակայն Սարգսյանը որևէ կառավարություն չի փոխել անարդյունավետ տնտեսական քաղաքականության պատճառով: Նրա պաշտոնավարման ընթացքում երկու վարչապետ է փոխվել, և երկու փոփոխության դեպքում էլ հիմնական մոտիվը եղել է ոչ թե տնտեսական անարդյունավետությունը, այլ քաղաքական նպատակահարմարությունը:
Վարչապետները փոխվել են, երբ դա պահանջել է իշխանական շահը, և Սերժ Սարգսյանն այդպիսով լուծել է իր իշխանության խնդիրը: Տիգրան Սարգսյանը պաշտոնից հեռացավ ոչ թե այն պատճառով, որ Հայաստանն արձանագրում էր, մեղմ ասած, ցածր տնտեսական ցուցանիշներ և ամենամեծ անկումն էր ունեցել համաշխարհային տնտեսության սանդղակում՝ 2008-ի համաշխարհային ճգնաժամից հետո, այլ հեռացավ, երբ ոչ իշխանական բևեռը հայտարարել էր շուրջօրյա հանրահավաքներ սկսելու մտադրության մասին:
Հովիկ Աբրահամյանը պաշտոնից հեռացավ ոչ թե կոռուպցիայի և ստվերի դեմ պայքարի անարդյունավետության հետևանքով, այլ որովհետև Սերժ Սարգսյանի համար հանդիսանում էր իշխանության համար պայքարի հիմնական մրցակիցը, և վարչապետի պաշտոնում նրա լինելը կարող էր բավականին ավելացնել 2017-18 թվականների իշխանության անցման փուլում այն ժառանգելու նրա հնարավորությունները:
Կասկած չկա, որ նա նույն քաղաքական, իշխանական անհրաժեշտության տրամաբանության և մոտիվացիայի շրջանակում է փոխելու նաև երրորդ վարչապետին: Համենայնդեպս, քանի դեռ Սարգսյանն ինքը հստակ չի հայտարարել իր քաղաքական ծրագրերի մասին, նրա որևէ քայլի հիմքում աներկբայորեն լինելու է հենց այդ տրամաբանությունն ու մոտիվացիան: Ընդ որում, ներդրումների ներգրավման հարցում ևս դա առանցքային հանգամանք է, որովհետև, ի վերջո, Սերժ Սարգսյանն արաբական ներդրողներին պետք է ասի, թե ո՞ւմ հետ են նրանք գործ ունենալու 2018 թվականից հետո, քանի որ ներդրումային պայմանավորվածությունների առումով մեկ տարին, ըստ էության, ակնթարթ է, և առարկայական խոսակցությունը անխուսափելիորեն ներառելու է 2018-ին հաջորդող ժամանակահատվածը:
Ըստ այդմ, Սերժ Սարգսյանը նրանց պետք է տա որևէ երաշխիք՝ որևէ անվան տեսքով: Ո՞ւմ անունն է տալու Սերժ Սարգսյանը Աբու Դաբիում: