Նախօրեին Արագածոտնի մարզում ՀՀԿ-ականները դանակահարել են «Ծառուկյան» դաշինքի շտաբերից մեկի պետին, որը գտնվում է ծայրահեղ ծանր վիճակում: Դանակահարությունը տեղի է ունեցել այն բանից հետո, երբ ՀՀԿ-ականները «Ծառուկյան» դաշինքի ներկայացուցչին կանչել են հարաբերությունները պարզելու: Հայաստանի խորհրդարանի ընտրության նախընտրական քարոզարշավը աստիճանաբար ստանում է արյունալի բնույթ: Նախ, ՀՀԿ-ականները միմյանց հետ էին արյունալի հաշիվներ պարզում, հետո Ջրառատի դեպքն էր ՕՐՕ դաշինքի ներկայացուցիչների հանդեպ, իսկ վերջին օրերին էլ բռնության են ենթարկվում «Ծառուկյան» դաշինքի ներկայացուցիչները:
Հիշեցնենք, որ մի քանի օր առաջ դաժան ծեծի էին ենթարկել «Ծառուկյան» դաշինքի ռեյտինգային թեկնածու Վահան Կարապետյանին՝ Չերիի Վահան մականունով: Ըստ տեղեկության՝ նրան ծեծել էին ԱԺ նախագահ Գալուստ Սահակյանի որդու՝ պետգույքի կառավարման վարչության պետ Արման Սահակյանի թիմակիցները, որը նույնպես Աջափնյակում առաջադրված ռեյտինգային թեկնածու է, բայց ՀՀԿ-ից: Արման Սահակյանը հերքեց, որ ինքն առնչվում է դրան, սակայն ԲՀԿ խոսնակ Վանիկ Էլիզբարյանը ֆեյսբուքյան գրառում էր արել, որում նշում էր, որ ԲՀԿ-ն զերծ կմնա նախընտրական շրջանում սադրանքներից, սակայն ապրիլի 3-ից հետո մեղավորները կստանան իրենց պատիժը: Եվ ահա նոր միջադեպ և դանակահարություն, կրկին «Ծառուկյան» դաշինքի թեկնածուի հանդեպ և դարձյալ ՀՀԿ-ականները:
Այսինքն՝ նոր սադրանքի՞ է մղվում «Ծառուկյան» դաշինքը, թե՞ Ծառուկյանը սոցհարցումների հրապարակումից հետո, որտեղ ինքն առաջինն է բոլորի մոտ, չի համաձայնում փոխզիջման գնալ ՀՀԿ-ի հետ: Սրան իհարկե դժվար է հավատալ, հաշվի առնելով Սարգսյան-Ծառուկյան հարաբերությունների ընթացքը 2015 թվականի փետրվարից հետո: Սակայն, այն որ ՀՀԿ-ականների և ԲՀԿ-ականների միջև արձանագրվում է արդեն երկրորդ բռնության միջադեպը, երբ արդեն երկրորդ ծառուկյանականն է ենթարկվում բռնության, սա, իհարկե, խոսում է առնվազն տեղային մակարդակում այս երկու ուժերի միջև բավականին թեժ և լարված իրավիճակի մասին:
Բնականաբար հարց է առաջանում, թե ինչով է սա պայմանավորված. վերևում առկա լարվածության առավել կոշտ և այսպես ասած անկաշկանդ դրսևորումն է տեղերո՞ւմ, թե վերևում ամեն ինչ ըստ խաղի սահմանված կանոնների է, պարզապես ներքևներում էլ գործում են վերևների հետ հարաբերության ավանդական կանոնները, իսկ այդ պարագայում Ծառուկյանի թիմի աշխատանքը, բնականաբար, ՀՀԿ-ականներին խոչընդոտում է կատարել իրենց պարտավորությունները այսպես ասած՝ իրենց վերևների առաջ: Իսկ վերևներին բնականաբար չի հետաքրքրում, թե ինչ «օբյեկտիվ» դժվարություններ ունեն ներքևները: Միևնույն ժամանակ, իհարկե, այստեղ իր դերն է խաղում ռեյտինգային ընտրակարգը, որի լարվածությունը սակայն գագաթնակետին հասնում է հենց վերևների առաջ պարտավորության տեսանկյունից, քանի որ զուտ թեկնածուների միջև պայքարը նոր չէ և մեծամասնականում եղել է նախորդ տարիներին:
Այս անգամ սակայն խնդիրը այն է, որ այսպես ասած՝ պայմանական մեծամասնականները կամ ռեյտինգայինները պատասխանատու են ոչ միայն իրենց համար, այլ նաև վերևների: Այսինքն՝ այլևս իրենք են իրենց գլխի տերը: Այս ամենով հանդերձ, հատկանշական է այն, որ բռնությունների «վեկտորը», ինչքան էլ տարօրինակ է հնչում այդ ամենը, թեքվում կամ շեղվում է դեպի ԲՀԿ, երբ թվում էր, որ այն հաստատուն կերպով «բռնել» է ՕՐՕ դաշինքի կողմը: Ինչ կանի «Ծառուկյան» դաշինքը կամ Գագիկ Ծառուկյանը իր թիմակիցների հանդեպ հերթական բռնությունից հետո: Նման միջադեպերը Ծառուկյանին, իհարկե, դնում են բավական դժվար կացության առաջ, որովհետև մի կողմից նրան մղում են առավել արմատականության, մյուս կողմից ակնհայտ է, որ նա հենց արմատականությունից է, որ փորձում է խուսափել:
Այսինքն՝ նման դեպքերի հետևանքով Գագիկ Ծառուկյանը հայտնվում է երկու քարի արանքում, այսինքն՝ ըստ էության ինքն է հայտնվում բավականին բարդ ընտրության առաջ՝ պատասխանե՞լ, թե՞ ոչ: Ընդ որում, կարճ ժամանակում երկրորդ դեպքը վկայում է, որ ՀՀԿ վերնախավը շարքերին որևէ կերպ չի հուշել կամ հորդորել Աջափնյակից հետո ձեռնպահ մնալ ծառուկյանականների հետ բախումներից: Մյուս կողմից հատկանշական է այն, որ Աջափնյակի դեպքից հետո «Ծառուկյան» դաշինքի ներկայացուցիչը ոստիկանությանն ասել էր, թե ինքն ընդամենը ընկել է և դրա հետևանքով վնասվել: Ինչ է ասվելու ոստիկանությանն այս անգամ և ինչպես է իրեն պահելու ոստիկանությունն ընդհանրապես:
