Ռուսաստանի արտգործնախարար Սերգեյ Լավրովն ու պաշտպանության նախարար Սերգեյ Շոյգուն Տոկիոյում են՝ բանակցելու իրենց ճապոնացի գործընկերների հետ հարցերի լայն շրջանակով, կողմերը կքննարկեն նաև իրավիճակը տարծաշրջանում՝ փոխանցում է TASS գործակալությունը։
Օրակարգում է նաև խաղաղ պայմանագրի կնքման հարցը։
Միջազգային և տարածաշրջանային անվտանգության հարցերով ընդհանուր դիրքորոշումների մշակումը կարևոր է Մոսկվայի և Տոկիոյի համար՝ ասել է ՌԴ արտգործնախարար Սերգեյ Լավրովը ճապոնացի գործընկեր Ֆումիո Կիսիդայի հետ բանակցությունների ժամանակ։
Բացի այդ, Լավրովը ընդգծել է երկկողմ հարցերի քննարկման կարևորությունը, ներառյալ բարձր մակարդակով շփումների գրաֆիկը։ Նա մատնացույց է արել նաև պլանների բազմազանությունը էկոնոմիկայի, մշակույթի և այլ ոլորտներում։
Շոյգուն իր հերթին ճապոնացի գործընկերոջ հետ հանդիպմանը նշել է առաջընթացը ռուս-ճապոնական հարաբերություններում։ Նա կարևորել է պաշտպանական կապերի ամրապնդումը, որը նրա կարծիքով՝ չպետք է հետ մնա քաղաքական շփումների դինամիկայից։
Ճապոնիայի պաշտպանության նախարար Տոմոմի Ինադան բողոք է արտահայտել հարավային Կուրիլյան կղզիներում ռուսական ստորաբաժանման և այնտեղ «երկիր-նավ» դասի հրթիռների տեղակայման առնչությամբ։ Kyodo գործակալության փոխանցմամբ՝ նա այդ մասին հայտարարել է ռուս գործընկերոջ հետ երկկողմ բանակցությունների ժամանակ։
Այսօր՝ օրվա երկրորդ կեսին, կողմերը կվերսկսեն հանդիպումները «2+2» ձևաչափով։