ԱՄՆ-ում մարտի 18-ին մահացել է ռոք-երաժիշտ‚ երգիչ, կիթառահար, երգերի հեղինակ, ռոք-ն-ռոլի լեգենդ Չակ Բերին: Նա կյանքից հեռացել է 90 տարեկանում Միսսուրի նահանգի իր տանը, հայտնում է CNN-ը:
Հաղորդվում է, որ երաժշտի տնից զանգ է ստացվել անհետաձգելի բժշկական օգնության ծառայությունում: Կանչով ժամանած բժիշկները Բերիին գտել են անգիտակից վիճակում: Նրանց չի հաջողվել փրկել երաժշտի կյանքը: Մահվան պատճառը չի նշվում:
2016 թ. հոկտեմբերին՝ իր 90-ամյակի օրը, Բերին ներկայացրել է իր նոր ալբոմը: Նախատեսվոմ էր, որ վերջին 38 տարում առաջին ալբոմը «Չակը», կթողարկվի 2017 թ.:
Չակ Բերին ծնվել է ԱՄՆ-ում 1926 թ հոկտեմբերի 18-ին: Նա համարվում է ռոք-ն-ռոլի հիմնադիրներից մեկը: Նրա երաժշտական կարիերան սկսվել է 50-ականների սկզբին, երբ սկսել է երգել Սենթ-Լուիսի ակումբներում: 1984 թ. երաժիշտն արժանացել է «Գրեմմիի» երաժշտության մեջ հատուկ ավանդի համար: 2 տարի անց նա դարձել է ռոք-ն-ռոլի Փառքի ծառուղում ընդգրկված առաջին երաժիշտներից մեկը: Բերին նաև 5-րդ տեղում է Rolling Stone ամսագրի վարկածով բոլոր ժամանակների մեծագույն կատարողների թոփ-100-ում:
Բերին թողարկել է 20 ստուդիական ալբոմ և 51 սինգլ, այդ թվում՝ Thirty Days (1955 թ.), Roll Over Beethoven (1956 թ.), Brown Eyed Handsome Man (1956 թ.), Rock and Roll Music (1957 թ.), Sweet Little Sixteen (1958 թ.), Johnny B. Goode (1958 թ.), You never can tell (1964 թ.): Երաժշտի վերջին սկավառակը՝ Rock It-ը, թողարկվել է 1979 թ.:
