«Բարգավաճ Հայաստան» կուսակցության երիտասարդները երեկ նախընտրական խնջույք են կազմակերպել կուսակցության առաջնորդ Գագիկ Ծառուկյանին պատկանող «Փարավոն» ռեստորանային համալիրում։
«Ծառուկյան» դաշինքի ռեյտինգային թեկնածու (Տավուշի մարզ) Վարուժան Բաբաջանյանը խնջույքին հրավիրել է նոյեմբերյանցի 21-ամյա Յուրի Մամյանին։ Վերջինս ՀԱԿ անդամ է, առաջիկա խորհրդարանական ընտրություններում ՀԱԿ-ՀԺԿ դաշինքի հանձնաժողովի անդամ է լինելու։ Խնջույքի ժամանակ վեճ է առաջացել երիտասարդի և ռեստորանի անվտանգության աշխատակիցների միջև՝ դրոշն ընկնելու պատճառով։
«Առաջին լրատվական»- ին երիտասարդի հայրը՝ Սուրեն Մամյանը, հայտնեց. «Թևը կպել է՝ դրոշն ընկել է, ինչ-որ ճաքել է։ Անվտանգության աշխատակիցները կանչել են սենյակ, քֆուր են արել, տղաս էլ պատասխանը տվել է, հետո մի քանի հոգով ոտքերով այնքան են հարվածել, որ տղայիս ոտքը կոտրվել է։ Անգամ Վարուժան Բաբաջանյանի հորդորները հաշվի չեն առել, այնպես են ծեծել։ Հետո տղայիս ընկերները նրան տեղափոխել են 8-րդ հիվանդանոց՝ պարզվել է ոտքը կոտրված է, բայց գիպս են դրել ու ճանապարհել տուն։ Տղաս էլ վախեցել է պատմել իրականությունը՝ ասել է իբր ընկել է»։