Իրանի ԱԳՆ-ը ՄԱԿ-ին կոչ է արել դատապարտել Իսրայելի ռազմաօդային ուժերի պրովոկացիոն գործողությունները Սիրիայում: «ՄԱԿ-ին կոչ ենք անում դատապարտել այդ ակնհայտ ագրեսիան և բոլոր ջանքերը ներդնել անվտանգության համար սպառնալիք ստեղծող այդպիսի պրովոկացիոն գործողությունների կրկնություն թույլ չտալու համար»,- TASS-ի հաղորդմամբ՝ այս մասին ասվում է Իրանի ԱԳՆ պաշտոնական ներկայացուցիչ Բահրամ Գասեմիի՝ շաբաթ օրը տարածած հայտարարության մեջ:
«Սիոնիստների ներխուժումը սիրիական տարածք ձեռնարկվել է այն ժամանակ, երբ Սիրիայի բանակը հաջող հակաահաբեկչական գործեղություններ է իրականացնում՝ ահաբեկիչներից մի քաղաքը մյուսի հետևից ազատագրելով: Այդ ագրեսիվ գործողությունները վկայում են ահաբեկչական ուժերի ամրապնդման գործում Իսրայելի հետաքրքրվածության մասին»,- նշել է իրանցի դիվանագետը:
Լույս ուրբաթ գիշերն Իսրայելի ռազմաօդային ուժերի 4 ինքնաթիռ գրոհել են մի քանի թիրախ Սիրիայում: Սիրիայի զինվորականները պնդում էին, որ գրոհի ընթացքում ինքնաթիռներից մեկը խփվել է, սակայն իսրայելցիները հերքել են այս պնդումը՝ հաստատելով ինքնաթիռների գնդակոծումը զենիթային հրթիռներով: