ԵՄ-ն հերթական անգամ դատապարտել է Ղրիմի միացումը ՌԴ-ին՝ այդ իրադարձության երրորդ տարելիցի առիթով։ Համապատասխան փաստաթղթում, որը հրապարակվել է Արտաքին կապերի եվրոպական ծառայության կայքում, ԵՄ երկրները անհանգստություն են արտահայտել Ղրիմում մարդու իրավունքներին առնչվող իրավիճակի հետ կապված, ինչպես նաև կոչ արել ՄԱԿ-ի բոլոր երկրներին միանալ Ռուսաստանի դեմ պատժամիջոցներին։
«Անցած տարի թերակղզում շարունակված ռազմականացումն ազդել է Սև ծովի տարածաշրջանում անվտանգության ոլորտի իրավիճակի վրա, իսկ Ղրիմի թերակղզում մարդու իրավունքներին առնչվող իրավիճակը շարունակել է վատթարանալ»,-ասվում է հայտարարությունում, որն արել է եվրոպական դիվանագիտության ղեկավար Ֆեդերիկա Մոգերինին միության 28 երկրների ԱԳ նախարարների անունից։
Պատժամիջոցներին միանալու ՄԱԿ-ի երկրներին հասցեագրված կոչը հնչում է արդեն երկրորդ տարին անընդմեջ և հիմնված է 2014 թվականի մարտի 27-ի ՄԱԿ-ի գլխավոր ասամբլեայի բանաձևի վրա, որը դատապարտում է անօրինական հանրաքվեի անցկացումն ու Ղրիմի միացումը Ռուսաստանին։