Եվրոպայի լիգայի խաղարկության 1/8-րդ եզրափակչում «Մանչեսթեր Յունայթեդը» սեփական հարկի տակ նվազագույն հաշվով հաղթելով «Ռոստովին»՝ դուրս եկավ քառորդ եզրափակիչ: Մեկ շաբաթ առաջ Դոնի Ռոստովի «Օլիմպ-2» մարզադաշտում տեղի ունեցած խաղում անգլիական ակումբի գլխավոր մարզիչ Ժոզե Մոուրինյոն ասպարեզ էր դուրս բերել երեք կենտրոնական պաշտպանների՝ Ջոնսին, Ռոխոյին և Սմոլինգին: Խաղային նման դասավորությունը Մոուրինյոն բացատրել էր խոտածածկի չափազանց վատ որակով: Ռուսաստանում այս երեք պաշտպաններին, այդուհանդերձ, չհաջողվեց հատկապես օդային պայքարում չեզոքացնել մրցակցի հարձակվողներին:
«Օլդ Տրաֆորդ» մարզադաշտում ևս Մոուրինյոյի թիմը հանդիպումը սկսեց երեք կենտրոնական պաշտպաններով՝ Սմոլինգ, Ռոխո, Բայի: Ըստ երևույթին, Մոուրինյոն մտավախություն ուներ, որ ոչ այնքան արագ ֆուտբոլ ցուցադրող «Ռոստովը» կրկին կփորձի հաջողության հասնել բարձրահասակ կենտրոնական հարձակվողներ Բուխարովի և Սարդար Ազմունի միջոցով: Այս անգամ «Յունայթեդի» պաշտպանական գիծը կրկին իդեալական մակարդակի չէր: Մասնավորապես, երկրորդ խաղակեսում Բուխարովին հաջողվեց բավական վտանգավոր հարված կատարել տուգանային հրապարակի կենտրոնից: Տվյալ դրվագում հաջող խաղաց դարպասապահ Ռոմերոն:
Առաջին կեսում Մոուրինյոյի թիմը ուշագրավ մի մարտավարություն էր որդեգրել: Հենրիխ Մխիթարյանը, Խուան Մատան, Զլատան Իբրահիմովիչն ու Պոլ Պոգբան ինտենսիով կերպով գործում էին մրցակցի կիսադաշտի ձախ եզրում: Նրանց չեզոքացնելու համար «Ռոստովի» պաշտպանական գրեթե ողջ ներուժը ևս տեղաշարժվել էր ձախ եզր: Արդյունքում «Մանչեսթերի» արագաշարժ եզրային պաշտպան Վալենսիան աջ եզրում ստանում էր ազատ տարածություն. նրան հսկում էր միայն հայազգի պաշտպան Խորեն Բայրամյանը: Վերջինիս համար Վալենսիայի դեմ խաղալը մղձավանջի էր վերածվել:
Բայրամյանը հազվադեպ է տեղ գտնում «Ռոստովի» մեկնարկային կազմում, և այս մրցավեճին նա մասնակցեց կադրային լուրջ խնդիրների պատճառով: Խաղային պրակտիկայից զրկված լինելն ու «Օլդ Տրաֆորդում» հայտնվելը Բայրամյանի համար, կարելի է ասել, շոկային ազդեցություն ունեցավ: Չի կարելի ասել, որ «Ռոստովի» հայ ֆուտբոլիստը տապալեց հանդիպումը, բայց որ նա պատրաստ չէր նման մակարդակի մրցավեճի, կարծում ենք՝ ակնհայտ էր:
Բայրամյանի գործոնը հավանաբար չէր վրիպել նաև Մոուրինոյի աչքից, և նա օգտագործեց մրցակցի խաղային բացը: Առաջին 40 րոպեներին Վալենսիան Բայրամյանին շրջանցելու 6 փորձ կատարեց, որոնցից 4-ը՝ հաջող: Իրավիճակը շտկելու համար «Ռոստովի» մարզիչները Բայրամյանին և աջ եզրային պաշտպան Տերենտևին փոխեցին դիրքերով: Երկրորդ կեսում Բայրամյանը պաշտպանության աջ եզրում ստիպված էր լինում կասեցնել Հենրիխ Մխիթարյանին: Եղավ մի դրվագ, երբ Մխիթարյանն ազատվեց Բայրամյանի հսկողությունից և պատրաստվում էր գրավել դարպասը: Եթե Իբրահիմովիչը ավելի շուտ չհարվածեր, ապա թե Բայրամյանին և թե «Ռոստովի» դարպասապահ Մեդվեդևին չէր հաջողվի խանգարել Հայաստանի ազգային հավաքականի ավագին:
Այս խաղում ևս Մխիթարյանը հանդիպման գլխավոր ֆիգուրներից մեկն էր: Դեռևս առաջին կեսում նա կարող էր գոլի հեղինակ դառնալ, սակայն նպաստավոր դիրքից վրիպեց: Մի քանի դեպքերում էլ Իբրահիմովիչն ուղղակի փոխանցում չկատարեց հարվածային դիրքում գտնվող մեր ֆուտբոլիստին: Հանդիպման միակ գոլը խփվեց Մխիթարյանի եզրային առաջխաղացման և դիպուկ փոխանցումից հետո:
Եվս մի ուշագրավ դրվագ: Հանդիպման 72-րդ րոպեին Ժոզե Մոուրինյոն պահեստայինների շարքում գտնվող կիսապաշտպան Էշլի Յանգի միջոցով կենտրոնական պաշտպան Ռոխոյին բանան փոխանցեց: Ռոխոն միրգը կերավ անմիջապես խաղադաշտում: Բանանի փոխանցումից մոտ 10 րոպե առաջ խաղադաշտ էր դուրս եկել «Ռոստովի» կենտրոնական հարձակվող Բուխարովը, ով առաջին մրցավեճի ժամանակ գրավել էր «Յունայթեդի» դարպասը: Բանանի միջոցով Մոուրինյոն լրացուցիչ լիցքեր հաղորդեց կենտրոնական պաշտպանին մրցակցի «թարմ» կենտրոնական հարձակվողին չեզոքացնելու համար:
«Լինում են դեպքեր, երբ օրգանիզմը հոգնած է և ինչ-որ բան է պահանջում: Ռոխոյին պետք էր այդ բանանը: Ծիծաղելու ոչինչ չկա: Մենք պետք է հաշվի նստենք ֆուտբոլիստի ֆիզիկական վիճակի հետ»,- հանդիպումից հետո ասել է Մոուրինյոն:
Հաջորդ հանդիպումը «Մանչեսթեր Յունայթեդը» կանցկացնի մարտի 19-ին՝ Պրեմիեր լիգայի շրջանակներում հյուրընկալվելով «Միդլսբրոյին»:
