Գերմանիայի կանցլեր Անգելա Մերկելն այսօր Վաշինգտոնում առաջին անգամ կհանդիպի Դոնալդ Թրամփի հետ՝ ԱՄՆ նախագահի պաշտոնում նրա ընտրվելուց հետո։
Ավելի վաղ հեռախոսազրույցի ընթացում ԱՄՆ առաջնորդը հրավիրել էր Գերմանիայի կանցլերին այցելել ԱՄՆ մայրաքաղաք։ Սակայն մարտի 14-ին նշանակված հանդիպումը հետաձգվել էր ԱՄՆ արևելյան ափին պատուհասած ձնաբքի պատճառով։
Հանդիպումը տեղի կունենա ուրբաթ առավոտյան, Սպիտակ տանը։ Բանակցությունները կընթանան նեղ շրջանակով, քննարկման կենտրոնում կլինեն անդրատլանտյան համագործակցության և միջազգային քաղաքականության թեմաները։
Այնուհետև զրույցին կմիանան պատվիրակության այլ անդամներ, ինչպես նաև բիզնեսի ներկայացուցիչները։ Օրվա երկրորդ կեսին ծրագրված է համատեղ մամլո ասուլիս և ճաշ, որը կազմակերպել է Թրամփը՝ Մերկելի այցի պատվին։ Այնուհետև կանցլերը կվերադառնա Բեռլին։
Մերկելն ավելի վաղ Բունդեսթագի նիստում ելույթ ունենալիս ասել էր, որ անդրատլանտյան հարաբերությունները «գերկարևոր նշանակություն» ունեն, և հենց դրա շուրջ էլ ինքը մտադիր է բանակցություններ վարել ամերիկացի գործընկերների հետ։
Դեռևս հայտնի չէ, Մերկելը Թրամփի հետ զրույցում կբարձրացնի՞ ամերիկյան կիբերլրտեսության հարցը։ Միևնույն ժամանակ Թրամփը, ինչպես ասել է ԱՄՆ վարչակազմի բարձրաստիճան ներկայացուցիչը, մտադիր է Մերկելի հետ խոսել Ռուսաստանից եկող կիբերսպառնալիքի մասին։