ՌԴ քաղաքացի Մարկ Վարդանյանին, ով Նորվեգիայից ԱՄՆ էր արտահանձնվել 2016 թվականի դեկտեմբերին, ԱՄՆ-ում համակարգչային խարդախության մեղադրանք է առաջադրվել։ Այս մասին հայտնել է Ջորջիա նահանգի Հյուսիսային շրջանի դատախազությունը՝ փոխանցում է TASS գործակալությունը։
Ամերիկյան իշխանությունները նրան մեղադրում են Citadel վնասակար ծրագրի մշակման, կատարելագործման ու վաճառքի մեջ, որը նախատեսված է համակարգչային համակարգերի վարակման և ֆինանսական հաշվետվությունների գողացման համար։ Ջորջիայի դատախազությունը Վարդանյանի արտահանձնումն անվանել է նոր օրինակ առ այն, թե ինչպես կարող է տարբեր երկրների իրավապահ մարմինների միջև փոխգործակցությունն օգտագործվել գլոբալ կիբերսինդիկատների գործունեության դադարեցման համար։
Դատախազությունը հղում է անում պրոֆիլային փորձագետների գնահատականներին, համաձայն որոնց՝ ծրագիրը վարակել է ողջ աշխարհում մոտ 11 մլն համակարգիչ և պատճառել ավելի քան 500 մլն դոլարի վնաս։
Citadel-ի գործով ԱՄՆ-ում անցել է նաև Դմիտրի Բելոռոսովը։ Նա 2014 թվականին իրեն մեղավոր էր ճանաչել և 2015-ի սեպտեմբերին դատապարտվել 4 տարվա և 6 ամսվա ազատազրկման։ Գերատեսչության հայտարարությունում գործածված է ձևակերպում, որը ցույց է տալիս ամերիկյան իշխանությունների ցանկությունը՝ հասնելու Վարդանյանից մեղքի ճանաչման։
Վարդանյանը, ով աշխատել է նորվեգական ընկերությունում և ապրել Ֆրեդրիկստադ քաղաքում, ձերբակալվել է ԱՄՆ իշխանությունների հայցով 2014 թվականի հոկտեմբերին և այդ ժամանակվանից գտնվել նախական կալանքում։
ՌԴ ԱԳՆ-ը Վարդանյանի գործը համարում է նման դեպքերի շղթայում հերթական օղակը։ «Մենք բազմիցս պարզաբանել ենք, որ այդ գործը հանդիսանում է ամերիկյան հատուկծառայությունների կողմից ողջ աշխարհում ռուսաստանցիների նկատմամբ իրականացվող որսի տարր»,-ասել է ՌԴ ԱԳՆ պաշտոնական ներկայացուցիչ Մարիա Զախարովան։ «Այդ որսը ոչ մի ընդանուր բան չունի արդարադատության իրական շահերի հետ և իրենից ներկայացնում է միջազգային իրավունքի նորմերի լիակատար անտեսում»։