Հայաստանի կառավարությունը բանակցություններ է վարում Վրաստանի իշխանությունների հետ՝ փորձելով Լարսին այլընտրանքային ճանապարհ գտնել, ձեռք է բերվելու երկու լաստանավ, ինչը կարող է ինչ-որ չափով կրճատել Լարսի ճանապարհի բարդությունները:
«Առաջին լրատվական»- ի հետ թեմայի շուրջ զրույցում Արտահանողների միության նախագահ Րաֆֆի Մխչեյանը, անդրադառնալով հարցին, թե որքանով է այս ծրագիրն իրատեսական և որքանով է ունակ բեռը թեթևացնելու, նշեց. «Եթե մենք այսօր Երևանից դուրս ենք գալիս, փորձում ենք հասնել Վրաստանի սահման, մոտ 220կմ ճանապարհ ենք կտրում, դրանից հետո մոտավորապես 50-60կմ պետք է անցնենք Թբիլիսի հասնելու համար, իսկ այնտեղից 150կմ էլ պետք է անցնենք Լարսի սահմանակետ հասնելու համար, այսինքն՝ աշխարհագրական այս տարածությունը շատ ավելի կարճ է, քան մինչև Բաթումի կամ Փոթի հասնելը, Թբիլիսիից Փոթի 370կմ է:
21-22տ բեռ տանող մեքենան ավելի քիչ ճանապարհ է անցնում Լարսի անցակետ հասնելու համար, քան Բաթումի, և ինչ լաստանավ էլ գնեն, այդպիսի մեքենայի տեղափոխումը մոտ 1000 դոլար կարժենա, մեքենան կիջնի ռուսական որևէ նավահանգստում, որտեղ ևս հավելյալ ճնապարհ պիտի անցնի՝ իր նշանակետին հասնելու համար: Սա նշանակում է, որ ահռելի հավելյալ ծախսեր պիտի արվեն: Ինչպե՞ս կարող է դա համարվել Լարսին փոխարինող: Այլ բան կլներ, եթե այդ լաստանավերը ժամանակին գնած լինեին և կարողանային պետական դոտացիայով աշխատեցնել, այսինքն՝ արտահանման համար հատուկ գնացուցակ սահմանեին, որը ինքնարժեքային կլիներ՝ միայն լաստանավի վառելիքի ծախսը վճարելով՝ բեռները կհասնեին իրենց նշանակետին, թեև մի քանի հարյուր կմ ավել կքշեին մեր վարորդները:
Մեր պետությունը պետք է հասկանա, որ Լարսը ամենամատչելին է, ամենավտանգավորն է, Լարսում նոր պետ է նշանակվել, որն ավելի է դժվարացրել մեր վարորդների անցուդարձը»:
Մանրամասները՝ տեսանյութում:
