Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում ավարտվեց Դավիդ Ստեփանյանի ներկայացուցիչ՝ «Վելես» հասարակական կազմակերպության նախագահ Մարինա Պողոսյանի բողոքի քննությունը: Պողոսյանը բողոք էր ներկայացրել քրեական գործի կարճման դեմ:
Հիշեցնենք, որ անցած տարի Դավիդ Ստեփանյանի դիմումի հիման վրա քրեական գործ էր հարուցվել ՀՀ քրեական օրենսգրքի 137-րդ հոդվածով («Սպանության, առողջությանը ծանր վնաս պատճառելու կամ գույք ոչնչացնելու սպառնալիքը»): Ստեփանյանը քննչական մարմնին ներկայացրել էր նաև ձայնագրություն, որում լսվում է, թե Քաղաքացիական ավիացիայի նախկին պետ Երիցյանն ինչպես է նրան սպառնում՝ ասելով, որ գումարը իրեն չվերադարձնելու դեպքում «արյուն ա լինելու»:
Ըստ գործի նյութերի՝ Հովհաննես Երիցյանը Դավիդ Ստեփանյանին ամսական 2% տոկոսադրույքով 900.000 ԱՄՆ դոլար էր տվել: Ստեփանյանի խոսքով՝ ինքը տասը տարի շարունակ ամսական 18.000 ԱՄՆ դոլար տոկոս է փակել, իսկ երբ այլևս չի կարողացել վճարել, Երիցյանը սկսել է սպառնալ իրեն:
Քրեական գործը կարճվել էր, թեև Ստեփանյանի ու Երիցյանի միջև որևէ առերես հարցաքննություն չէր անցկացվել: Մարինա Պողոսյանը դատարանում պնդեց, որ գործը թերի է քննվել:
Դատախազ Նարեկ Խաչատրյանն առարկեց բերված բողոքի դեմ՝ համարելով, որ այն անհիմն է: Խաչատրյանը թեև նշեց, որ ձայնագրությունը չի կարող ապացույց դիտվել, քանի որ Երիցյանը նախազգուշացված չի եղել, որ իրեն ձայնագրում են, այնուամենայնիվ՝ անդրադարձավ դրա բովանդակությանը:
«Ձայնագրությունում լսվում է «արյուն ա լինելու» արտահայտությունը, որն ուղղված չէ Հովհաննես Երիցյանի կողմից Դավիդ Ստեփանյանին: Ըստ էության, նա վկայակոչում է այլ անձի: Անմիջական սպանության սպառնալիք չի եղել»,- կարծում է դատախազը:
Մարինա Պողոսյանն էլ առարկեց՝ նշելով, որ եթե սպառնալիքներ չլինեին, Ստեփանյանը ստիպված չէր լինի ընտանիքի հետ հեռանալ Հայաստանից:
Այսօր դատավորը հրապարակեց իր որոշումը, որով բավարարեց «Վելես» ՀԿ-ի նախագահի բերած բողոքը: Փաստորեն, դատարանը ընդունեց, որ քննությունը թերի է կատարվել, և որոշում կայացրեց վերացնել գործը կարճելու մասին որոշումը:
Հ.Գ. Դատարանում Դավիդ Ստեփանյանի իրավունքները պաշտպանող Մարինա Պողոսյանի դեմ վերջին երեք տարում երկու քրեական գործ է հարուցվել, որոնցից մեկը կարճվել է, իսկ մյուսի քննությունն ընթանում է Կենտրոնի դատարանում: Պողոսյանին հարցրինք՝ մեղադրյալի կարգավիճակը արդյոք չի՞ խանգարում նրան այլ գործերով քաղաքացիների իրավունքները պաշտպանել: «Նախ՝ մեղադրյալը ընդամենը կարգավիճակ է, իսկ իրավապաշտպան լինելը՝ հոգեվիճակ: Բացի այդ, եթե իրենց նպատակն էր իմ դեմ քրեական գործ սարքելով լռեցնել ինձ կամ խլել մեր ժամանակը, որպեսզի ես չկարողանայի պաշտպանել այլ մարդկանց իրավունքները, ապա իրենք չեն հասել իրենց ուզածին, բնականաբար՝ մենք շարունակում ենք պաշտպանել մեր շահառուների իրավունքները և մինչև վերջ էլ շարունակելու ենք զբաղվել իրավապաշտպան գործունեությամբ»,- «Առաջին լրատվական»-ի հետ զրույցում ասաց Մարինա Պողոսյանը: