Անգլիայի գավաթի խաղարկության քառորդ եզրափակչում «Մանչեսթեր Յունայթեդը» 1:0 հաշվով զիջեց «Չելսիին» և դուրս մնաց հետագա պայքարից: Հանդիպման ելքն ըստ էության վճռվեց դեռևս 35-րդ րոպեին, երբ երկրորդ դեղին քարտը ստանալով՝ դաշտից հեռացվեց «Յունայթեդի» հենակետային կիսապաշտպան Անդեր Էրերան:
«Մանչեսթերի» երկրպագուների զգալի մասը վստահ է, որ երկրորդ դեղին քարտը հանդիպման գլխավոր մրցավար Մայքլ Օլիվերը անտեղի ցույց տվեց: Իսկապես, այդ դրվագում Էրերան այնքան էլ կոպիտ չգործեց, և կարելի էր չդիմել նման կոշտ որոշման, բայց… Կարմիր քարտի գլխավոր պատճառը, կարծում ենք, 20-րդ րոպեին Էրերայի ոչ ադեկվատ արձագանքն էր առաջին դեղին քարտ ստանալու ժամանակ: «Մանչեսթերի» կիսապաշտպանը չզսպելով կրքերը՝ ցուցադրաբար, այսպես ասած, «մունաթ» եկավ Օլիվերի վրա՝ նրա հասցեին հնչեցնելով տհաճ խոսքեր: Օլիվերը իր հերթին վրեժխնդիր եղավ: Նա սպասում էր հարմար առիթի Էրերային դաշտից հեռացնելու համար և ցույց տված առաջին քարտից ընդամենը 15 րոպե անց հասավ իր նպատակին:
Հայտնվելով ծանր իրավիճակում՝ Մոուրինյոն իրավիճակը շտկելու փոխարեն վերջնականապես «թաղեց» իր թիմին՝ փոխարինելով Հենրիխ Մխիթարյանին: Ինչո՞ւ Մոուրինյոն խաղից հանեց ոչ թե Մարկուս Ռեշֆորդին, այլ Մխիթարյանին: Անկախ Էրերայի հեռացումից՝ Մոուրինյոն չպետք է խաղադաշտում թողներ Ռեշֆորդին: Նրա գործողությունների 90 տոկոսը խոտան էր: Անմիտ և բավական թույլ հնարքներով Ռեշֆորդն ուղղակի տապալում էր խաղն առջևի գծում: Խաղից առաջ Ռեշֆորդը վատառողջ էր, և հայտարարվել էր, որ նա բաց է թողնելու այս հանդիպումը: Բնական է, խաղալով 10 ֆուտբոլիստներով և անցնելով խուլ պաշտպանության՝ «Մանչեսթերը» պետք է հույսը դներ արագ հակագրոհների վրա:
Փոխարինելով Մխիթարյանին՝ Մոուրինյոն զրկեց «Յունայթեդին» նաև այդ հնարավորությունից: Իսկ թե ինչպես է Մխիթարյանը գործում հակագրոհների ժամանակ՝ հայտնի է բոլորին: Հիշենք «Տոտենհեմի», «Լեսթերի» հետ հանդիպումները: Մխիթարյանի հեռանալուց հետո «Յունայթեդի» կազմում չմնաց ֆուտբոլիստ, ով կարող էր իր վրա վերցնել խաղը:
Մոուրինյոյի գլխավոր բացթողումներից կարելի է համարել նաև խաղի սկզբից Մատա-Մխիթարյան խաղային զույգին չօգտագործելը: Այս հանդիպումը որակազրկման պատճառով բաց թողեց թիմի առաջատար Զլատան Իբրահիմովիչը: Նման մեծ կորստի պայմաններում Մխիթարյան-Մատա դուետը, կարծում ենք, ամենաարդյունավետը կլիներ: Հիշենք Անգլիայի լիգայի գավաթի խաղարկության «Հալ Սիթիի» հետ մրցավեճը: Առանց Իբրահիմովիչի՝ Մատա-Մխիթարյան զույգը վճռեց դիմակայության ելքը: Հենց հանդիպման սկզբից նկատվում էր, որ բացակայում է այն ֆուտբոլիտը, ով պետք է համագործակցի Մխիթարյանի հետ: Կարելի էր Ռեշֆորդի փոխարեն խաղի սկզբից նոմինալ հարձակվողի դիրքում օգտագործել Ֆելաինիին, ում հաջողվում է գնդակ պահել և փոխանցումներ մատակարարել եզրից գործող ֆուտբոլիստներին:
Ինչ վերաբերում է «Չելսիին», ապա լոնդոնյան թիմը խաղաց իր ֆուտբոլը: Զգալով, որ «Մանչեսթերը» անցել է ամուր պաշտպանության, դաշտի տերերը ապավինեցին հեռահար հարվածներին: 52-րդ րոպեին Կանտեն տուգանային հրապարակից դուրս կատարած հարվածով բացեց հաշիվը՝ էլ ավելի ծանր դրության մեջ դնելով Ժոզե Մոուրինյոյի թիմին: Երկրորդ խաղակեսի ընթացքում էր «Չելսին» առանց լարվածության խաղարկեց գնդակը: Գնդակին տիրելու տոկոսային հարաբերությունը 75-25 էր հօգուտ «Չելսիի»:
Ինչևէ, ընդամենը երկու օր հետո «Մանչեսթեր Յունայթեդը» Եվրոպայի լիգայի խաղարկության 1/8-րդ եզրափակչի պատասխան հանդիպում է անցկացնելու՝ սեփական հարկի տակ մրցելով «Ռոստովի» հետ: Մարտի 19-ին էլ Մոուրինյոյի գլխավորած թիմը Պրեմիեր լիգայի շրջանակներում կհյուրընկալվի «Միդլսբրոյին»:
